Gora behera bortitzenak AEBetako merkatuetan ematen ari dira. Indize jarraituena den S&P500-k urtarrileko gorenekotik %20ko jaitsierako langa gainditu zuen (bear market izatera heltzen den puntua kontsideratzen da %20ko jaitsiera), Nasdaq Composite indize teknologikoak %30ekoa (aipatutako bear marketa batez ere teknologia enpresa handietan gertatzen ari da) eta Rusell 2000-k (kapitalizazio txikiagoko enpresen indizea) %27,4ko jaitsiera. Aurrekoa kontuan hartuta, hiru eszenatoki aurreikusten dira: okerra, okerragoa eta okerrena.
Lehenengo eszenatoki okerra softlanding delakoa da. Inflazioaren aurkako neurriek, batez ere erreserba federalak ezarritako interes tasek, bere eragina izango lukete, eta nahiz eta ekonomia moteldu, ez litzateke geldiune ekonomikora helduko. Apirileko inflazioa martxokoa baino txikiagoa izan da. Produktuen prezioen igoera gelditu egin da, prezio malguena bereziki, ez prezio zurrunena. Eta bost urtera, hurrengo bost urtetarako (2027-2032) egiten diren inflazio aurreikuspenak %3aren azpitik egongo lirateke.
Gora behera bortitzenak AEBetako merkatuetan ematen ari dira. [...] Aurrekoa kontuan hartuta, hiru eszenatoki aurreikusten dira: okerra, okerragoa eta okerrena
Eszenatoki okerragoa izango litzateke baldin eta inflazioa kontrolatzeko Erreserba Federalak interes tasak igotzen jarraitu beharko balu ekonomia gelditzeraino, horrek ekonomi atzeraldia ekarriko luke-eta. Aktiboen balorazioak gehiago jaitsi beharko lirateke, eta finantza krisitik izandako hazkundearen erdia galtzera helduko lirateke, azken hamarkadako interes tasa baxuak betirako lortuta zirelakoan. Ekonomiek beti atzeraldi bat izan behar dute momentu batean. AEBtan inflazioa oso altua da eta langabezia baxua, beraz, pentsa daiteke ziklo baten mugara iritsi direla, nahiz eta azken hilabetean langabeziak zerbait gora egin. Balizko atzeraldi honetan enpresen irabaziek nolabaiteko babesa suposatuko lukete inflazioaren aurrean. Inflazioa kontrolatuz gero, interes tasak berriro jaitsi eta ziklo berri bati hasiera emango litzaioke.
Estagflazio eszenatokia izango litzateke okerrena. Funtsen kudeatzaileak, managerak, eszenatoki honetan ari dira mugitzen. Mundu mailako hazkundearekiko ezkorrak dira, eta etorkizuneko etekinen aurreikuspen negatiboa dute. 2001etik gaur arteko edozein unetan izan duten cash kopuru handiena gordetzen ari dira. Cash izateak esan nahi du suerta daitekeen aukera baten zain egotea, eta horrek benetako beldurra adierazten du. 2008an ere lehengaien eta petrolioaren prezioen igoeraren harira estagflazio eszenatokia aurreratzen zuten, baina orduan ez zuten asmatu.
Estagflazio eszenatokian inflazioak gora egiten jarraitzen du, interes tasak gora egiten jarraitzen dute, eskariak lur jota utzi, eta ekonomia hondoratu egiten da.
AEBetatik kanpo ezin dezakegu esan bear market edo balorazioen jaitsiera joeran nagusia denik.
Bear market, AEBtik kanpo | Iturria: Bloomberg
Mundu mailako MSCI indizeari (AEB izan ezik) AEBko inflazioa kenduz ikusten da 2007ko gorena ez duela gainditu. Grafikoan ikusi daiteke COVID-19 ondorengo garaian gainditu zuela baina jaurti zen likidezia jarioaren ondorioz izan zen. Beraz, zuzena da esatea, AEBtik kanpo, 2007tik balorazioen jaitsiera joeran daugoela, eta beraz, epe luzeko ikuspegitik merkatu interesgarriagoak direla AEBkiko alderatuz.
Europa
Christine Lagardek, Europako Banku Zentraleko presidenteak, adierazi du azken hamarkadan mantendu den politika monetarioa aldatu, eta birritan interes tasa igoko duela 2022ko irailerako. Horrela, tasa horiek zerotik gora geldituko lirateke. Urteetan tasa negatiboetan ibili ostean, aldaketa handia litzateke. Lagarde beraren hitzetan, politika monetarioa gogortzea baino, helburua izango litzateke indarrean dagoen diru errazaren politika aldatzea.
Ukrainako inbasioa edo energi hornidura arazoen aurretik ere, kezka ugari zeuden Europako ekonomiari lotuta, baina 7.000 exekutibo alemaniarrei egindako IFO inkestaren arabera, konfiantza indartsu mantendu da.
Lagarde beraren hitzetan, politika monetarioa gogortzea baino, helburua izango litzateke indarrean dagoen diru errazaren politika aldatzea
Azkenik, AEBetako Erreserba Federalak ezarritako interes tasen eta Europako Banku Zentralak ezarritakoen arteko urte hasierako arrakala txikitzen ari den heinean, badirudi dolarra ahultzen ari dela eta 1,04 €/$-etik 1,07 €/$-era pasatu dela.
Txina
Txinako ziklo monetarioa AEB eta Europatik guztiz aldentzen da, eta kreditu erraztasunean murgilduta dago. 10 urterako Txinako bonoek ez dute inolako gainsaririk eskaintzen AEBetako Treasury delakoekin alderatuta. Epe laburreko bonoak ere, aurrekoekin alderatuz, ez dira hain eskuzabalak, eta horrek dakar yuanak dolarraren aurrean balioa galtzea.
Hor dira, gainera, COVID-19 eta COVID-19 zero politikaren ondorio kaltegarriak ekonomian. Politika horiek eragindako ekonomia geldiunearen ondorioz, lehengaiek behera egin dute, eta ez itsas trafikoak eragindako botila-lepoaren ondorioz eskaintza gutxitu delako, eskaria gutxitu delako baizik.
Aurrekaria: 2015eko yuan aren balio-galtzea
2015ekin alderatuz topatzen ditugun berdintasun eta ezberdintasunak topa daitezke. Batetik, epe laburrean ekonomiaren hazkundea orduan espero zen bezain eskasa da orain. Mendebaldeko eskaria Txinako produktuekiko mantsotu egingo da hurrengo hilabeteetan, kontsumitzaileen kontsumo ohiturak produktuak kontsumitzetik zerbitzuak eskatzera aldatzen ari den heinean. Txinako teknologia enpresa handiak 2020ko martxoko langaren azpitik kotizatzen ari dira.
Bestetik, Errusia eta Ukrainaren arteko gudaren ondorioz AEBek ezarritako zigorrak ere albo kalteak eragiten ari dira. Txina lehengaien inportatzaile handia den heinean gudak Txinaren komertzioa estutzen du. Era berean, moneta erreserba eskasagoa dauka gaur egun, 2015arekin alderatuz.
Mendebaldeko eskaria Txinako produktuekiko mantsotu egingo da hurrengo hilabeteetan, kontsumitzaileen kontsumo ohiturak produktuak kontsumitzetik zerbitzuak eskatzera aldatzen ari den heinea
Azkenik, lasaitasunerako datuak ere badaude. Agintariak, orduan ez bezala, prest daude, eta kapitalen kanporako bidea ekiditeko neurriak hartu dituzte. Eta are garrantzitsuagoa dena: Txinako ekonomian 2015ean zegoena baino askoz ere likidezia gutxiago dago. Orain, berriz, iturria zabaltzen ari dira, eta errebotearen esperantza hor dago.