Nafarroako gobernuak hileroko zerga-bilketari buruzko datuak iragarri ditu. Horien arabera, uztaileko bilketa likido metatua 2.020,2 milioi eurokoa izan da. Iazko uztailekoa 1.960,4 milioi eurokoa izan zenez gero, % 3 hazi da zerga-bilketan gobernuak jasotakoa, % 7,1 handitu baita bilketa metatua. Hori dela eta, zerga-bilketa likido metatuarekin diru-sarreren aurrekontuaren % 48,3 izan du.
Hilabeteko guztizko bilketari dagokionez, 3.067,6 milioi euro jaso ditu gobernuak, aldizkakoak ez diren zergak edo maiatzean sortutako hileroko zergen epemugak direla eta, besteak beste. Itzulpenei dagokienez, ohi bezala doaz: 1.047,4 milioi euroko itzulpenak egin dira. 2021ekoak oso murritzak dira.
Atal bakoitzari erreparatuz gero, zerga zuzenen bilketa 1.037,1 milioi eurokoa izan da, iazkoa baino % 6,6 handiagoa. Zehazkakoetan, berriz, behera egin du % 0,8, 966,1 milioi eurokoa izan baita. Tasak eta bestelako diru-sarrerak % 28,5 hazi dira, 17,1 milioi euroraino.
PFEZak ere gora egin du: 924,3 milioi euroko bilketa metatua izan du gobernuak, 2021eko uztailean baino % 14,1 gehiago. Laneko atxikipenen portaera onak, eta enpresari eta profesionalen ordainketa zatikatuak eragin dute hori batez ere.
Sozietateen zergan bildutakoa, ordea, % 22,8 jaitsi da, 65,5 milioi euroko balio erantsia izan baitu.