Altxa dezala eskua ordu luzeak eman ez dituenak, desesperazio puntu larri batera iristeraino, telefonoan eskegita, hizketan, ezer ulertzen ez duela ematen duen langile gaizki ordaindu batekin demandan, telefono faktura baten gehiegizkoa erreklamatzeko, argi-indarraren tarifa aldatzeko edo hegazkin txartel baten dirua bueltatzeko.
Egungo mundu kapitalistan, ia lehenago nahi gaituzte kontsumitzaile eta bezero, herritar baino. Kontsumitzaile garenez, Espainiako Konstituzioak babestu egiten gaitu, botere publikoei kontsumitzaile eta erabiltzaileen defentsa bermatzeko agintzen baitie, nahiz eta sarritan zenbait enpresen erabiltzaile garenean iruditu ahal zaigun kaka burutik behera egiten digutela —onar bekit zakarkeria— telefonoan eskegita pasatako ordu luzeen ondorio ezinbestekoa, ziur asko.
Ekainak iragarri digu kontsumitzaileen defentsa agintzen digun Lege proiektu berria Madrileko Kongresuan. Momentuz proiektu dena, labur, oso labur, geratzen da, nire irudikoz, kontsumitzaile han txiki egiten gaituzten konpainia handien oinetan. Ezin uka, hala ere, erakusten duela asmo(txo) bat kontsumitzaile eta bezeroentzako arreta hobetzeko. Apur bat bada ere.
Lege izan nahi duen honen helburua da ur, gas eta argindarraren hornikuntza, bidaiarien garraio zerbitzua, posta zerbitzua, sarbide baldintzatuko ikus-entzunezko hedabideak eta komunikazio elektronikoetan zerbitzua ematen duten enpresek, bezeroei arreta ematerakoan, kalitatezko zerbitzu gutxieneko bat bete dezatela.
Horrela, dio lege-proiektuak, aipatutako zerbitzuak ematen dituzten enpresek bezeroari arreta emateko zerbitzu eraginkor eta irisgarri bat izan beharko dute, bezerooi informazioa emateko, eta jar ditzakegun kexa eta erreklamazioei erantzuteko. Kexak hilabeteko epean ebatzi beharko dira. Zein hizkuntzatan? Ez bezeroak aukeratutako hizkuntzan, baizik eta kontratua erredaktatuta dagoenean. Aukera galdua bezeroaren hizkuntza hautua errespetatzeko.
Bestalde, ezartzen du lege-proiektuak, kalitatezko maila gutxieneko batzuk bermatu beharko dira bezeroarekiko arretan: pertsona batekin hitz egiteko eskubidea daukagu, ez makina batekin; arreta doakoa izango da; gure kexak zenbaki bakarra eta zentralizatua izango du, edozein arretagilek erantzun ahal izan dezan. Era berean, deien % 90ean minutu bat pasa ahalko da, gehienez, operadore edo agente komertzialarekin pasatzen diguten arte. Eta bezeroa asebetetzeko neurriak ere ezarri beharko dira, Administrazioak auditoriak egin ahal izango ditu enpresetan, eta asebetetzea neurtu egingo da.
Azkenik, lege-proiektuak sei hilabeteko epea ezartzen du finantza eta aseguru entitateek bezeroari arreta emateko zerbitzuen kalitatea lege honen parera ekar dezaten.
Emendakinak aurkezteko epea ekainaren 20an bukatu zen. Ondoren, Kongresuan eztabaidatu eta bukaeran onartuko da. Ikusiko dugu zein aldaketekin, ikusiko dugu zein mamirekin, baina oker ez banaiz, oraindik ere ordu batzuk pasa beharko ditugu telefonoan eskegita konpainiekin demandan.