Gabonetako bazkariak edo langilea beti langile

Tempus fugit. Berriro ere Gabonetako inguruan egiten diren gauzetan murgilduta aurkitzen dut nire burura. Kokoteraino nago (gaude?) Gabonetako argiekin (urritik ipinita daudenak), supermerkatuetako zirrikitu guztiak betetzen dituzten turroi eta mazapanekin eta gero eta lehenago egiten diren enpresa bazkariekin (edozein jatetxetan lekua topatzea ezinezkoa bihurtzen dute).

Azken horiei dagokienez, iritzi emaile honek denetarik ikusi du ibilbide profesionalaren ikuspuntutik (ikuspuntu pertsonaletik ere, baina hori beste kontu bat da...).

Izan ere, Gabonetako bazkarietan eta, batez ere, afarietan, esango nuke eztabaidak eta borrokak askotan ematen direla (ez duzu bakarrik zure koinatuekin eztabaidatuko amaginarrebaren etxeko afarian). Eta langileek askotan ahaztu egiten dute enpresak antolatutako afaria bada, langile baten jokabide desegokiek diziplinazko garrantzia izan dezaketela. Eta bai, batzuetan kaleratzea izan daiteke ondorioa.

Egia da kaleratzea gehienezko zigor gisa erreserbatuta dagoela enpresaren ekitaldi batean gerta daitezkeen jokabide larrienetarako, baina egia da ere batzuetan gauza oso larriak ematen direla. Horrela, batzuetan, tonu-igoeraren eztabaidak (alkohola eta aurretiazko ezinikusiak lagun) irain eta erasoaldi fisikoetan amaitzen dira. Adibidez, Auzitegi Gorenak 2022ko epai batean berretsi zuen diziplinazko kaleratze bat bidezkoa zela kasu honetan: enpresaren Gabonetako afaria egin eta jatetxetik irtetean langile batek lankideak larriki iraindu eta erasotzeagatik, nagusiak ez zeudenean.

Bestalde, ez ahaztu auzitegietan erraz amaitu daitekeen beste kontu bat trafiko-istripuak direla eta ez bakarrik arrazoi zibil edo penalengatik, baizik eta baita Gizarte Segurantzagatik ere. In itinere lan-istriputzat hartuko da langileak lantokira joatean edo handik itzultzean jasan dezakeen istripua. Beraz, enpresako afaria lan-harremanaren testuinguruan antolatutako afaria denez, hara joateko bidean edo afari horretatik itzultzeko bidean istripua ematen bada, lan istriputzat jo daiteke, lanaren eta istripuaren arteko harremana "hausten" duen pisuzko arrazoi bat ez badago behintzat. Oro har, auzitegien arabera, alkoholaren kontsumoak ez du indargabetzen in itinere istripuaren lan-kalifikazioa, istripuaren eta istripua izan duen langilearen intoxikazio-egoeraren arteko kausaltasun-lotura zuzena egiaztatzen bada salbu.

Gogoratu ere afarietan ateratzen diren argazki eta bideoak, askotan desegokiak eta askotan pentsatu gabe sare sozialetan barreiatzen direnak.

Edozelan, gogoratu beti (batez ere Gabonetan) On Kixote Mantxakoak Santxo Panzari emandako aholkua (Bigarren Zatiko XLIII Kapituluan) euskaraz gutxi gorabehera horrela itzuliko zena: "Izan zaitez epel edanean, kontuan harturik ardoak ez duela ez sekreturik ez hitzik gordetzen".