Pertsona batek nahi duen moduan pentsatzeko edo jarduteko konbentzitzeko trebetasuna da influentzia. Gaur egun influentziaren trebetasuna ogibide bilakatu da, influencerra, alegia.
Influencerra da jarraitzaileak diren edo ez diren beste pertsona batzuen portaerari modu positiboan edo negatiboan eragiteko gaitasuna duen pertsona, pertsona-komunitate baten autoritate eta ospea duena. Sare sozial batean edo beste komunikazio-kanal batean nabarmentzen den pertsona da, eta gai jakin bati buruzko iritziak ematen ditu, gai hori ezagutzen duten pertsona askorengan eragin handia dutenak, jarraitzaileen kontsumo-ohituretan, adibidez.
Eragina izatea da norbait beste era batera pentsatzeko edo jarduteko konbentzitzeko ahalmena, sekulako boterea, eta mugikorra, sare sozialetako kontu bat eta interneten dagoen edozeinen esku egon daiteke. Hausnartzeko modukoa.
Aldiz, mugarik ez dagoenez, modu zuzenean hitz eginez gero edozer esan dezakete. Orokortu ezin bada ere, batzuetan nire iritziz ez dute balio erantsirik eskaintzen. Besterik gabe, jada ospetsuak dira eta euren jarraitzaileek txutxu-mutxuak soilik nahi dituzte.
Datuen arabera, Europan 10,5 milioi influencer aktibo daude sare sozialetako plataformen artean, eta % 15 Espainiakoak dira. Influencer fabrika sumatzen da. Are gehiago, azken hilabete honetan hori islatzen duen bideo bat biralizatu da. Bideo horretan ehunka pertsona ikus daitezke kalean, norbere streaminga egiteko setarekin. Zeure buruari galdetuko diozu basakeria horren zergatia. Beharra eta amua, eragina eta bizitza hobea izateagatik.
Beldurra ematen dit merkatuaren eboluzioa ikusteak, eta ez bakarrik sektore horrek mugitzen duen diru kopuruagatik. Espainian 10.000 influencer profesional baino gehiago daude. Eskuragarri dagoen azken datua 2021ekoa da. 4.000 milioi eurotik gorako inbertsioa egin da publizitate digitalean, eta horietatik 1.191 sare sozialetara bideratu dira. Gizartean izan ditzakeen eragin eta ondorioengatik, zenbat aldiz aldatu dugu produktu bati buruzko iritzia, influencerren bat ikusi duzulako gomendatuz?
Nire ustez, marketina eta publizitatea oso arriskutsua bihurtu da. Edozein mezu, produktu, edo bitarteko eraldatzen dakiten profesionalak prestatzen ari gara, beste pertsona batengan behar bat sortzeko. Manipulatu dezaketen pertsonak prestatzen ari gara, eta adibide garbia dugu influencerretan. Baina galdera da, teknika eta ezagutza horien erabilera mugatzeko gai gara? Nola ziurtatu dezakegu marketinaren etika?
Ez dakit etorkizunean zer gertatuko den, baina benetan espero dut mugak jartzeko gai izatea.