Datorren ostiraletik igandera bitartean Bioterra azokaren edizio berri bat egingo da Irungo (Gipuzkoa) Ficoba erakustazokan. Gaur egin dute azokaren aurkezpena, eta antolatzaileek azaldu dute 120 bat erakusketari espero dituztela.
Cristina Laborda Irungo alkateak, Jose Ignacio Asensio Gipuzkoako Foru Aldundiko ingurumen diputatuak, Azahara Domiguez Mugikortasuneko, Turismoko eta Lurralde Antolaketako diputatuak eta Maialen Gaztañaga azokako zuzendariak eman dituzte aurtengo edizioaren xehetasunak, zeinetan “elikadura ekologikoan” jarriko duten azpimarra.
"Ikuspegi berri horrek ez ditu azokaren zutabe historikoak ordezkatzen – nekazaritza ekologikoa, bioeraikuntza, kontsumo arduratsua edo ingurunearekiko errespetua –; aitzitik, zabaldu egiten ditu, ongizatearen dimentsioa eta bizi-kalitatea bere arlo guztietan txertatuz: elikaduran, etxean, energian, kosmetikan edo eraikuntzan", azaldu du Gaztañagak.
Produktu eta zerbitzu ekologikoak eskaintzeaz gain, hainbat jarduera ere izango dira azokako hiru espaziotan: Amalurra, Sukaldean eta Eskuz Faktoria izenekoetan.
Bioterrak, halaber, azokan hamar urtez izan diren hainbat erakunderi omenaldia egingo die, besteak beste, Euskal Herriko Arkitektoen Elkargo Ofizialari (COAVN), Txingudiko Zerbitzuei, Baskegurri, Mestizaki, Filtros Doultoni eta Bidasoa Activari.