EAEko siderurgia sektoreak sortzen dituen hondakinak hobeto aprobetxatzeko helburuarekin, Siderex Siderurgiaren Kluster Elkarteak eta Aclima Basque Environment Cluster-ek Siderloop proiektua abiatu dute. Ekimenaren bidez, ibilbide-orri teknologiko bat prestatuko da, hondakin siderurgikoak balorizatzeko aukera berriak identifikatzeko eta kudeaketa zirkularragoa sustatzeko. Hasierako proposamen-zorro bat ere osatuko da, etorkizunean ikerketa, garapen eta berrikuntzako proiektuetan nahiz industria mailako saiakuntzetan garatu ahal izango diren hiru eta bost ekimen artean biltzeko.
EAEko siderurgiak ekonomia zirkularrean aurrerapenak egin dituen arren, oraindik badira balorizazio-bide sendorik ez duten hondakin motak. Gaur egun, sektoreak EAEn sortzen diren hondakin guztien %20 inguru sortzen du, eta horietatik %50 inguru baino ez da balorizatzen. Testuinguru horretan, SIDERLOOPek hondakinen kudeaketa eredu erreaktiboa alde batera utzi eta ezagutzan, plangintzan eta eragileen arteko lankidetzan oinarritutako estrategia garatu nahi du.
Proiektuak sortzen diren hondakinen azterketa, teknologia berrien jarraipena, araudiaren analisia eta enpresekin, Zientzia, Teknologia eta Berrikuntzaren Euskal Sareko eragileekin nahiz administrazioekin egingo den lankidetza uztartuko ditu. Horren emaitza gisa, EAEko hondakin siderurgikoei buruzko datu-base bat eta balorizazio-potentziala zehaztuko dituen mapa prestatuko dira. Gainera, sektoreko lan-mahaiak antolatuko dira, lehentasunak adostu eta etorkizuneko garapen-aukerak identifikatzeko.
Azterketen emaitzen arabera, etorkizunean aztertu ahal izango da EAEn hondakin siderurgikoak balorizatzeko industria-instalazio bat garatzeko aukera ere, betiere haren bideragarritasun teknikoa, ekonomikoa eta arautzailea bermatzen bada. Siderloop proiektua ELKARTEK – Interes Bereziko Ekintza Osagarriak programaren barruan onartu da, Eusko Jaurlaritzaren babes ekonomikoarekin.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta