Auzolanean eraikitako udal-igerilekutik 30 urte bete dituen kanpinera

Etxarri Aranatzeko kanpina udalaren jabetzakoa da eta emakida baten bidez kudeatzen da. Udal-igerilekuen eraikuntzarekin hasi zen, auzolanaren bidez egin zirenak. Aralarren magaleko behealdean basoaren zati bat laga zen, herritik oso gertu, eta, haritzen artean, kanpina sortu zen.

1996an ireki zituen ateak, hasiera batean 30 partzela besterik ez zituela. Pixkanaka, instalazio berriak eraikitzen joan ziren eta kanpina, batez ere, partzeletan oinarritutako kanpin gisa sendotu zen, alokairuko sei bungalow ere gehituz. Era berean, bezero finkoei partzelak eskaini zitzaizkien, urte osoan beren karabanak bertan izateko.

Hasieratik 2019ra arte, inguruko bikote batek kudeatu zuen kanpina. Urte horretan erretiroa hartu zuten, eta ustiapena lehiaketara atera zen. 2024tik  Susanna Sureda da zuzendaria. Bartzelonan jaioa, 22 urte dira Etxarri Aranatzen bizi dela. Turismo-enpresen kudeaketari buruzko ikasketak egin zituen, eta 2019an hasi zen kanpinean lanean, harreran. “Azken batean, sail guztien jarraipena egitea eta kanpinaren funtzionamendua xehetasun guztiekin ezagutzea da nire lana”, deskribatu du.

Bai kantitatean, bai eskaintzan hazi den kanpina

Kanpinak “bilakaera izan du eta bere eskaintza zabaltzen joan da”. Espainiar estatu mailako kanpin-sare batean integratuta dago, Taïga Resorts deiturikoa, eta bai zuzendaritza, bai langile-taldea herriko eta inguruko pertsonek osatzen dute.

Gaur egun, kanpinak 50 partzela baino gehiago ditu, “baita hainbat gelako aterpetxea eta erabilera anitzeko areto bat ere, taldeentzat aproposa”. Horrez gain, 28 ostatu eskaintzen ditu, hainbat mota eta edukierakoak. “Azken urteotan apustua egin dugu eskaintza dibertsifikatzearen eta bezeroentzako esperientzia berriak sortzearen alde, betiere kanpinaren esentzia eta naturarekiko lotura mantenduz”, gehitu du Suredak.

Bataz besteko erabiltzailea: familia euskaldunak

Igerilekua, instalazioa zeinetatik kanpina eratzen hasi zen, terrazatik ikusita | Argazkia: utzitakoa

Urte osoko bezero finkoak, batez ere, Nafarroakoak eta Euskal Autonomia Erkidegokoak dira. Profil nagusia familiarra da, "familia euskaldun asko eta haurrak dituzten familiak" baitira. Udan, Suredaren ekipoak atzerriko bisitari ugari ere jasotzen ditu, batez ere nederlandarrak eta britainiarrak. Estatuko bezeroen artean, katalanak, valentziarrak eta madrildarrak izaten dira ohikoenak.

“Familia-kanpina gara eta udako egonaldiek, oro har, 7 eta 12 egun arteko iraupena izaten dute”, azaldu du zuzendariak. Gainera, “guztiz pet friendly kanpina” da: maskotak onartzen ditu partzela eta ostatu guztietan.

Negozio-eredua bezeroaren beharretara begira

“Gure negozio-eredua, batez ere, turismo-ostatuan oinarritzen da, baina gaur egun kanpin bat ez da soilik partzela bat eskaintzea”, ziurtatu du Suredak.

Etxarriko Kanpinean hainbat ostatu mota daude: partzelak, bungalowak, taldeentzako aterpetxea, etab. Horri esker, bezero-profil oso desberdinetara irits daitezke eta “askotariko behar eta aurrekontuetara egokitu”.

Sureda: “Gure negozio-eredua, batez ere, turismo-ostatuan oinarritzen da, baina gaur egun kanpin bat ez da soilik partzela bat eskaintzea”

Ostatuaz gain, hainbat zerbitzu eta esperientzia ere eskaintzen dituzte: igerilekua, kirol-instalazioak, animazioa, jarduerak, txangoak eta jatetxea, esaterako. Eskaintza osatzeko, kanpinak “inguruko janaria eskaintzen duen jatetxeadu, baita plater konbinatuak ere. Gainera, “terraza zoragarria du, igerilekuari eta basoari begira”.

Aste Santuan, uztailean eta abuztuan, haurrentzako animazioa eta jarduerak antolatzen dira kanpinean. Bestelako ekintzak ere eskaintzen dituzte: “Basora egindako txangoak, yoga, masajeak eta pixkanaka gehitzen ari garen beste hainbat proposamen”. Zuzendariak gehitu du kanpina Navarra en bici Klubaren barruan dagoela; bizikletak konpontzeko eta garbitzeko tailerra eduki, bizikletak alokatu, eta inguruko ibilbideei buruzko informazio zabala eskaintzen dute, “maila desberdinetarako”.

Etxarri Aranatzeko kanpineko bungalow-partzela | Argazkia: utzitakoa

Beraientzat “oso garrantzitsua" da eskaintza dibertsifikatzea eta bezeroak egonaldian zehar "esperientzia osoa" izatea. Aitzitik, negozio-eredua hiru zutabetan oinarritzen da: ostatu-eskaintza askotarikoa, bezeroaren esperientzia eta lurraldearekiko lotura.

Sakanako ekonomian sumatzen den eragina

"Kanpinak eragin garrantzitsua du Etxarri Aranazko eta Sakanako ekonomian", dio zuzendariak. Izan ere, 600 pertsona ingururentzako edukiera du eta, “batez ere udan bisitari kopuru handia” jasotzen du. Bezeroak horiek ez dira kanpinaren barruan bakarrik geratzen. Alderantziz, “herrira ateratzen dira, erosketak egiten dituzte, jatetxeetara joaten dira, aisialdiko jarduerak egiten dituzte, inguruko interesguneak bisitatzen dituzte eta hainbat zerbitzu erabiltzen dituzte”, berretsi du Suredak.

Sureda: "Kanpinak ez du soilik ekarpen ekonomikoa egiten; kulturaren eta kirolaren arloan ere modu aktiboan parte hartzen du”

Beraz, kanpinaren eragina instalaziotik haratago doa: "eragin positiboa du eskualdeko merkataritzan, ostalaritzan, aisialdiko jardueretan eta turismoan". "Guretzat garrantzitsua da hori, bezeroa kanpinean soilik ez geratzea, baizik eta Etxarri Aranatz eta Sakana ezagutzea eta herriko bizitzan ere parte hartzea”. Gainera, ahal den neurrian inguruko hornitzaileekin lan egiten saiatzen dira kanpinean, eta tokiko produktuei eta zerbitzuei ikusgarritasuna ematen diete.

"Kanpinak ez du soilik ekarpen ekonomikoa egiten; kulturaren eta kirolaren arloan ere modu aktiboan parte hartzen du”, gehitu du zuzendariak. Besteak beste, hainbat mendi-lasterketaren eta lasterketa solidarioren babesle da, eta konpromisoa hartzen du hainbat ekimen kulturalekin eta euskararen aldeko ekimenekin, Korrika eta Nafarroa Oinez, kasu. Era berean, haranean garatzen diren hainbat izaera eta helburutako ekimenetan parte hartzen dute eta, ahal duten neurrian, “horien garapenean” laguntzen dute.

Otsailean itxi

Kanpinaren denboraldiaren amaiera Gau Beltzaren bueltan izaten da. Hortik aurrera, asteburuetan, jaiegunetan, zubietan eta Gabonetan bakarrik irekitzen dute. “Otsailean kanpina itxita egoten da, eta hilabete hori langileek oporrak hartzeko eta denboraldi berria prestatzeko erabiltzen dugu”, zehaztu du. Harik eta martxoaren 1ean, berriz ere, zabaltzen duten. 

Udako hilabeteetan, batez ere uztailean eta abuztuan, “okupazioa oso handia da eta kanpina ia beteta egoten da”. Udaberrian eta udazkenean, berriz, beste bezero mota batzuk jasotzen dituzte: “Asteburua igarotzera etorritakoak, taldeak, kirolariak eta ingurua ezagutu nahi duten bisitariak”.