Urtarrila hilabete erabakigarria da kirol ekipamenduaren sektorearentzat. Tradizioz, pertsona asko jarduera fisikoari berriro ekitera bultzatzen ditu urte berriak, gimnasioan izena ematera edo kirol armairua birplanteatzera. Joera hori gimnasioetan edo kirol-zentroetan ez ezik, Euskal Autonomia Erkidegoko denda espezializatuetan ere nabaritzen da; izan ere, ekipamendu eta kirol-arroparen salmentek dinamismo jarraituaren seinaleak erakutsi dituzte.
Itziar Uriarte Markaide Intersport Arrasateko (Loramendi) arduradunaren ustez, urtarrileko salmentetan asmoek baino pisu handiagoa dute beste faktore batzuek: "Erregeek, eguraldiak, beherapenek... faktore askok dute eragina. Urte amaieran, berriz, Olentzerok markatzen du erritmoa".
Ekipamendu eta kirol-arroparen salmentek dinamismo jarraituaren seinaleak erakutsi dituzte
Autonomia erkidegoko salmentei buruzko datu ofizialak ez dira beti espainiar estatu osokoaren maiztasun berarekin argitaratzen, baina lurralde-zifra baliagarriak daude testuinguruan kokatzeko. Eustat Euskal Estatistika Institutuaren arabera, erkidegoan 582 denda daude kirol eta aisialdi aktiborako ekipamendua saltzen dutenak. Nabarmendu beharra dago, Gipuzkoan beste erkidegoetan baino handiagoa dela denda espezializatuen kopurua 10.000 biztanleko. Alegia, halako establezimenduen merkataritza-dentsitatea handia da.
Espainiar estatuan, Statistaren arabera, kirol-ekipamenduaren merkatuak hazten jarraitu du azken urteotan: kate handiak izan dira salmenten buru, eta merkataritza omnikanalak —fisikoak eta digitalak direnak aldi berean— gorakada izan du, sektoreko diru-sarreren zati handi bat hartzen baitu dagoeneko. Merkataritza-sare trinkoaren eta kirol-ohitura errotuen konbinazio horri esker, EAE bereziki lurralde interesgarria da biztanleria nola bizi den eta kirola nola kontsumitzen den aztertzeko.
Kirol dendak lurraldean: kate handietatik tokiko saltokietara
EAEn bakarrik egindako salmenten datu publiko bereizirik ez dagoen arren, badaude testuingurua marrazteko aukera ematen duten adierazleak. Erkidegoan, kirolean eta aisialdi aktiboan espezializatutako denda ugari daude. Horrek, merkatu aktiboa dagoela erakusteaz gain, kirolarekin, mendiarekin, itsasoarekin edo fitnessarekin lotutako produktuak kontsumitzera ohituta dagoen biztanleria ikusarazten du.
Sektoreko kate handien aurrean, Intersport Loramendi bezalako saltokiek euren nortasun propioa aldarrikatzen dute. Frankizia bat izan beharrean, denda independente gisa funtzionatzen dute. “Erosketetan aske gara; gure eskaintza guztia gure bezeroei begira osatzen dugu”, azaldu du Uriartek. Horrek ahalbidetzen die bezero bakoitzari egokitzen zaion produktua aurkitzea.
Loramendiren kasuan, bereizgarri nagusia giza-faktorea da: euskarazko arreta, zuzena eta konfiantzazkoa. Balio horiek funtsezkoak dira multinazionalen eta online plataformen hoztasunari aurre egiteko.
Fitnessetik Wellnessera: eskariaren bilakaera
Nahiz eta 2024 eta 2025 urteetarako datu ofizialak erkidegoka finkatu, zenbait seinalek aldaketa interesgarriak iradokitzen dituzte kontsumo-ereduan: Fitness eta Wellnes kategoriek dinamismo handia erakusten dute. Uriarteren arabera, gorakada ez da gimnasiora doan jendera mugatzen; bizitza osasungarriak eguneroko janzteko eran eragiten du, bai arropan, bai oinetakoetan.
Outdoor eta aire zabaleko jarduerek —txirrindularitza, trail running, mendiko kirolak— jarraitzaile leialen oinarria mantentzen dute, euskal kirol kulturan ohikoa dena. Loramendin nabaritzen dutenez, espezializazio maila handia izan arren, euren publiko nagusia kirolari amateurra edo hasten ari dena da, baita estilo urbana bilatzen duena ere.
Tokiko dendak, bezeroari buruzko ezagutzarekin eta arreta pertsonalizatuarekin, kanal orotasuna eta eskala ekonomia kapitalizatzen dituzten marka eta kate handiekin batera bizi dira
EAEko kirol ekipamenduko merkataritzak tradizioa, espezializazioa eta kontsum-modu berrietara egokitzea konbinatzen ditu. Tokiko dendak, bezeroari buruzko ezagutzarekin eta arreta pertsonalizatuarekin, kanal orotasuna eta eskala ekonomia kapitalizatzen dituzten marka eta kate handiekin batera bizi dira.
Etorkizuneko erronka: Kontsumo etikoaren kontraesana
Sektoreak 2025-2026 aldirako duen erronkarik handiena ez da soilik digitala, etikoa baizik. Intersport Loramendiko arduradunak hausnarketa sakona egiten du gaur egungo kontsumo ohituren inguruan: “Gure erronkarik handiena gure balioan sinestea da, bereziki, giza-balioan”.
Uriartek agerian utzi du gaur egungo kontsumitzailearen kontraesana: ingurumena eta tokiko lanpostuak babestu nahi direla esan arren, askotan plataforma erraldoiak erabiltzen dira erosketak egiteko. “Internetek kalte egiten dio inguruneari, trafikotik hasi eta airearen kalitateraino. Gure etorkizuna herritarren esku dago; beraiek erabakiko dute guk zerbaitetarako balio dugun ala ez”.