EAEn proiektu eraldatzaile berria abiatu da: nanomedikuntza pertsonalizatuan aplikatzeko hidrogel adimendunak garatzeko proiektua, hain zuzen ere. Datozen hiru urteetan, 72 milioi euroko hasierako inbertsioa egingo da. Mikel Jauregi Industria sailburuak aurkeztu du ekimena, Euskadi 2030 Industria Planaren barruan, eta jakinarazi dutenez, 72 milioi horietatik 28 milioi euro baino gehiago ikerketa eta garapen teknologikoko jardueretara bideratuko dira.
I+Med enpresa du buru proiektuak, eta sare biofarmazeutiko aurreratu bat sustatzea du helburu, "EAE Europako erreferente gisa posizionatzeko". Horretarako, hamar enpresek (erdiak ETEak), Basque Health Clusterrak eta Zientzia, Teknologia eta Berrikuntzaren Euskal Sareko bederatzi zentro teknologikok hartuko dute parte ekimenean, azken horien buru Gaiker Fundazioa eta CIC Biomagune izanik.
Enpleguari dagokionez, proiektuaren garapenak goi-mailako prestakuntza duten zuzeneko 232 lanpostu eta zeharkako beste 370 sortuko ditu 2026 eta 2028 artean, hau da, guztira 602 enplegu berri aurreikusten dira. Jauregiren arabera, euskal bioosasun-sektoreak, zeina neurri handi batean enpresa gazteek osatzen duten, “hazkunde-potentzial izugarria du” eta horrelako ekimenek eremu estrategiko gisa finkatzen laguntzen dute.
I+Med-etik, zuzendari exekutibo den Manu Muñozek azpimarratu du helburua medikuntza “pertsonalizatu eta zehaztasunezkoa” lortzea dela, balio-kate osoan oinarrituta, ikerketatik hasi eta fabrikazioraino. Ildo berean, parte hartzen duten enpresek nabarmendu dute proiektuak aukera emango duela beren jarduera dibertsifikatzeko eta industria- eta teknologia-lankidetza indartzeko zabaltzen ari den sektore batean.
Proiektu berri hau programa beraren barruan aurkeztu diren beste biri gehitu behar zaie (ITP Aerorena eta Danobatena), guztizko inbertsioa 232 milioi eurotik gorakoa izanik, eta enplegu aurreikuspena 1.900 lanpostu ingurura igoz.
