Kuantikaz bai! hitzaldi zikloari jarraipena emango diote Donostian irailaren 2an, asteartean. Izan ere, Tabakalerako Kutxa Fundazioa Klubeko aretora bertaratuko da Eduardo Sáenz de Cabezón matematikari eta dibulgatzailea, “Manotazos en una habitación oscura. La llegada de la computación cuántica” izenburua duen hitzaldia eskaintzera. Zehazki, konputazio kuantikoak sortzen dituen erronkak eta aukerak aztertuko ditu hizlariak.
Izan ere, lau hamarkada igaro dira jada lehen ikertzaileak konputazio kuantikoa ikertzen hasi zirenetik, baina , hala ere, oraindik ere ziurgabetasuna sortzen duen gaia da. Horregatik, bere ohiko estilo argi eta hurbila erabilita jorratuko du gaia Sáenz de Cabezónek.
Errioxako Unibertsitateko irakaslea eta matematikako doktorea dena, dibulgazio zientifikoan erreferente bilakatu da. The Big Van Theory bakarrizketari zientifikoen taldearen sortzaileetako bat da, Youtubeko Derivando kanalean aurkezle eta gidoilari lanak egiten ditu, eta Órbita Laika programaren aurpegi ezagunetako bat da.
Hitzaldia Kutxa Fundazioak eta Donostia International Physics Centerrek antolatutako zikloaren barruan dago, zeinak helburu duen fisika kuantikoa gizarteratzea eta “Bigarren iraultza kuantikoa” deiturikoaren garrantzia azaltzea. Ekitaldia 18:30ean hasiko da eta sarrera doakoa izango da, edukiera bete arte.
