Basque Health Clusterren bultzadaz, Terapia Aurreratuen Biofabrikazioko euskal huba jaio da. Ekimenaren helburua da EAEko sektore bioteknologikoa osatzen duten enpresa, erakunde eta agenteen arteko sinergiak piztea, elkarlana bultzatzea, baliabideak eta ezagutza partekatzea eta, hala, industria-ahalmena sendotzea eta kanpoko merkatuetan proiekzio handiagoa lortzea. Hain justu, terapia aurreratuak garatzea eta eskala industrialean fabrikatzea erraztuta, arlo horretan Europako erreferente bihurtzea du xede.
Maria Ribate Basque Health Clusterreko Nazioartekotze zuzendariarekin hitz egin dugu hub berriak eskaintzen dituen aukerez eta planteatzen dituen erronkez.
Ekonomia eta enpresari buruzko informazio guztia biltzen du EnpresaBIDEAren buletinak, euskara hutsean. Egunero-egunero emailean jaso dezakezu, guztiz doan, bi minutu besterik ez dituzu behar harpidetzeko. Eta proiektu hau hazten jarrai dadin lagunduko diguzu.
Basque Health Cluster 2010ean sortu zen, eta gaur egun enpresak, zentro teknologikoak, ikertzaileak eta osasun arloko eragileak biltzen dituen ekosistema zabala da. Nolako bilakaera izan du sektore bioteknologikoak ordutik hona?
2010etik hona, Euskadiko biozientzien eta osasunaren sektoreak hazkunde eta profesionalizazio handia izan du. Hasierako ekosistema txikiago hartatik, gaur egun balio-kate osoa biltzen duen sektore batera igaro gara: ikerketa, teknologia, industria, osasun-sistema eta merkaturatzea. Enpresa berriak sortu dira, gaitasun teknologikoak sendotu dira eta nazioartekotzea ere handitu da. Gainera, gero eta argiago ikusten dugu zientziatik industriara eta merkatura jauzia egitearen garrantzia.
Zer da terapia aurreratuen biofabrikazioa?
Terapia aurreratuen biofabrikazioa terapia horiek modu seguruan, kontrolatuan eta eskalagarrian ekoizteko behar diren prozesu eta teknologien multzoa da. Terapia zelularrak, genikoak eta ehunen ingeniaritzan oinarritutako terapiak hartzen ditu barne. Tratamendu berritzaile hauek gaixotasun konplexuei aurre egiteko aukera berriak eskaintzen dituzte. Biofabrikazioa, beraz, ezinbestekoa da terapia horiek laborategitik pazientearengana eramateko.
EAEk terapia aurreratuen arloan gaitasun handiak dituzten enpresak, zentroak, ospitaleak edota ikerketa-taldeak ditu. Zein dira ekosistema horren indarguneak?
Euskadiren indargune nagusietako bat balio-kate osoa izatea da, baina bereziki azpimarratuko nuke terapia aurreratuen arloan ditugun enpresen gaitasuna eta espezializazioa. Enpresa horiek ikerketa, teknologia eta osasun-sistemarekin konektatzen dira, eta ekoizpenerako gaitasunak ere baditugu. Espainian eta Europako hegoaldean ez dago gaitasun horiek guztiak biltzen dituen antzeko ekosistemarik, eta Europan ere oso gutxi daude. Erronka nagusia gaitasun horiek eskalatzea eta nazioarteko posizionamendua indartzea da.
"Gure helburua oso argia da: terapia aurreratuak garatu eta fabrikatzea, baina batez ere pazientearengana iristea, hor baitago benetako inpaktua"
Terapia Aurreratuen Biofabrikazioko euskal hub berria industria-ahalmena indartzeko sortu da, besteak beste. Zer helburu lortu nahiko zenituzkete?
Helburu nagusia Euskadik dituen gaitasunak elkartu eta industria-ahalmen sendoagoa bihurtzea da, ikerketatik pazientearenganako bidea azkartzeko. Horretarako, proiektuak laborategitik ekoizpen industrialera eramateko gaitasuna handitu, azpiegiturak eta ezagutza partekatu eta enpresen arteko lankidetza sustatu nahi dugu. Azken batean, gure helburua oso argia da: terapia aurreratuak garatu eta fabrikatzea, baina batez ere pazientearengana iristea, hor baitago benetako inpaktua.
Asmoetako bat EAE biofabrikazioaren arloan Europako erreferente bihurtzea da. Zer eskain diezaiekegu nazioarteko puntako enpresa edo proiektuei?
Euskadik ekosistema oso konektatua eskaintzen du, non ikerketa, teknologia, enpresak, osasun-sistema eta erakunde publikoak elkarrengandik hurbil dauden. Horrek lankidetza publiko-pribatua eta eragileen arteko elkarlana errazten ditu. Gainera, terapia aurreratuetan espezializatutako talentua, gaitasunak eta azpiegiturak ditugu. Nazioarteko enpresei, beraz, proiektuak garatu, eskalatu eta pazientearengana eramateko ekosistema konektatu bat eskaintzen diegu.
Zer oztopo dituzte gaur egun euskal enpresek terapien garapenetik industria-ekoizpenerako urrats hori egiteko? Nola laguntzen die hubak horiek gainditzen?
Aurrerapauso hori egiteak inbertsio handiak, araudiaren ezagutza, prozesuen industrializazioa eta eskalatzeko gaitasuna eskatzen ditu. Enpresa txiki eta ertainentzat bereziki zaila izan daiteke gaitasun horiek guztiak bakarka garatzea. Hubak gaitasunak eta baliabideak konektatzea ahalbidetzen du, enpresen, zentro teknologikoen, ikerketa-eragileen eta osasun-sistemaren arteko lankidetza indartuz.
"Europako hegoaldean ez dago Euskadiren gaitasun guztiak biltzen dituen antzeko ekosistemarik. Erronka gure nazioarteko posizionamendua indartzea da"
Bada dagoeneko hubaren babespean abian jarri den proiektu, lankidetza edo ekimen zehatzik?
Bai, hubaren inguruan dagoeneko badira lankidetza eta proiektu zehatzak abian. Horien bidez, gaitasunak identifikatzen, eragileak konektatzen eta biofabrikazioaren balio-katea indartzen ari gara. Helburua da ekimen horiek eskalatzea eta benetako industria-aukeretan gauzatzea. Aldi berean, Euskadik dituen gaitasunak nazioartean ikusarazi eta haren posizionamendua indartu nahi dugu, eta terapia aurreratuei eragiten dieten erabakietan Euskadik eta haren industriak ahotsa izan dezaten lan egin.
Hubak lagun dezake biofabrikazioaren arloko gaitasuna, baliabideak edo bazkide teknologikoak behar dituzten atzerriko enpresak EAEra erakartzen?
Bai, eta hori aukera estrategikoa dela uste dugu. Euskadik biofabrikazioan duen eskaintza modu bateratuan erakusteak nazioarteko enpresei gure ekosistema hobeto ezagutzeko aukera ematen die. Kanpoko enpresa batek teknologia, azpiegitura, bazkide industriala edo garapen klinikorako ingurune egokia behar badu, Euskadin hainbat gaitasun aurki ditzake. Horretarako, ordea, gure eskaintza nazioartean modu argi eta koordinatuan ikusarazi behar dugu.
Epe ertainean EAE terapia aurreratuen nazioarteko merkatuan erreferente bihurtzea aurreikusten duzue?
Helburua hori da, eta horretarako Euskadik dituen gaitasunak industria-ahalmenarekin eta nazioarteko konexioekin lotu behar ditugu. Baina, horrez gain, badugu beste erronka bat: egiten ari garena erakustea eta Euskadik terapia aurreratuen arloan duen potentziala nazioartean ezagutaraztea. Ez dugu soilik garatu eta fabrikatu nahi, gure gaitasunak ikusgarri egin eta Europako balio-katean posizio estrategikoa lortu nahi dugu. Horrek inbertsioa, talentua eta nazioarteko proiektuak erakartzen lagunduko digu.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta