Gipuzkoako ekonomiak aurrera egiten jarraitzen duela erakusten dute Adegik egindako Egoera Ekonomikoari buruzko Inkestaren azken emaitzek, baina baita lurraldeko industria-sektorea gero eta egoera ahulagoan dagoela ere. Datu orokorren arabera, enpresen %83k diote beren merkatuak normaltasunean edo susperraldian daudela, eta batez besteko fakturazioa %3 hazi da azken hiruhilekoan, batez ere, kanpo-merkatuen bultzadari esker.
Hala ere, datu positibo horien azpian kezkarako arrazoiak daude, bereziki, industriari dagokionez. Izan ere, industria-enpresen laurdenak adierazi du merkatuak atzeraldian daudela, eta makina-erremintaren eta ekipoen sektorean portzentaje hori %44ra iristen da. Eskaeren ahultasuna ere nabarmena da, azken lau urteetako mailarik baxuenera iritsita, eta produkzio-ahalmena batez beste %80an kokatzen bada ere, zenbait azpisektoretan ehunekoa askoz txikiagoa da.
Enpresen lehiakortasuna higatzen duten faktoreek egoera zailtzen dute. Adegik azaldu duenez, lan-kostuen igoera da kezka nagusietako bat, industriaren erdiari baino gehiagori eragiten diona, eta ziurgabetasun geopolitikoak ere gora egin du nabarmen azken urtean. Horrez gain, kostu baxuko herrialdeetako kanpo-lehia, bereziki Txinatik datorrena, inoizko mailarik handienera iritsi da, eta horrek eragin zuzena du prezioetan, marjinetan eta eskaera-zorroetan.
Egoera horri aurre egiteko, enpresa gehienek kostuak murrizteko eta barne-eraginkortasuna hobetzeko neurriak hartu dituzte, baita merkatuak eta bezeroak dibertsifikatzeko estrategiak ere. Teknologia berrietan eta digitalizazioan inbertitzen dutenak gutxiago dira, eta hornikuntza-katean edo finantza-egituran aldaketak egiten dituztenak oraindik gutxiengoa dira.
Enpleguari dagokionez, epe laburrean egonkortasuna nagusitzen da, industria-enpresen %85ek plantilla mantendu edo handitzea aurreikusten baitute. Dena den, 2026ari begira, ziurgabetasuna handiagoa da, eta industriaren geldialdia agerikoa da. Testuinguru horretan, Adegik ohartarazi du industria defendatzea funtsezkoa dela lurraldearen etorkizunerako, eta azpimarratu du beharrezkoak direla lehiakortasuna eta autonomia industriala indartuko dituzten politikak.