Euskadiko Borondatezko Gizarte Aurreikuspeneko Erakundeek (BGAE) 32.696 milioi euroko ondarearekin amaitu zuten 2025. urtea, aurreko urtean baino ia 2.000 milioi gehiago, %6ko hazkundea lortuta. Datu hori Euskal Autonomia Erkidegoko barne produktu gordinaren herenaren (%33,26) parekoa da jada.
Arduradunen arabera, BGAEen eredua sendotuta dago, baina oraindik ere badu garatzeko tartea. Gaur egun, 1,3 milioi bazkide baino gehiago egonagatik ere, benetako pertsona kopurua (bikoizketak ezabatuta) 878.028koa da, hau da, 16 urtetik gorako biztanleen %45,6. “Oso datu esanguratsuak dira, baina oraindik ez dira nahikoak”, nabarmendu du Juan Alberdi Eusko Jaurlaritzako Finantza Politikako eta Gizarte Aurreikuspeneko zuzendariak, estaldura handiagoa eta oreka territoriala lortzeko beharra azpimarratuta.
Alberdik azpimarratu du sistema ez dela soilik aurrezki-tresna gisa ulertu behar, baita babes ekonomikorako mekanismo aktibo gisa ere bai. 2025ean, ekarpenak 1.064 milioi eurotik gorakoak izan ziren, eta prestazioen ordainketak 862 milioira iritsi ziren. Gauzak horrela, Bilbon gaur egindako urteko balantzearen aurkezpenean esan dute sistemak “milaka pertsonaren benetako beharrei erantzuten diela”, bereziki erretiro garaian.
Bestalde, enpleguko gizarte-aurreikuspenari dagokionez, estaldura %24,23koa da EAE osoan, baina alde handiak daude lurraldeen artean: Gipuzkoan %41etik gorakoa da, eta Araban zein Bizkaian %20tik beherakoa. Alberdiren ustez, egoera horrek agerian jartzen du hazkunde orekatuagoa bultzatzeko beharra.