Denis Itxaso Eusko Jaurlaritzako Etxebizitza sailburuak esan du bere sailak 10.000 etxebizitza babestu berri baino gehiagorekin itxiko duela legegintzaldia, eta horietatik 7.000 gutxienez “arrazoizko alokairura” bideratuko direla. Diario Vasco egunkariak Donostian antolatutako Gipuzkoa al día Foroan egindako hitzaldian, onartu berri den Etxebizitza, Lurzoru eta Hirigintzako presazko neurrien legea izan du hizpide sailburuak, proiektuak arintzeko eta udalen ahalmena indartzeko “urrats erabakigarria” dela iritzita.
Itxasok azpimarratu duenez, legeak helburu du izapideak gutxitzea, udal-autonomia handitzea eta 75.000 etxebizitza babestu eraikitzeko aukera ematen duten lurzoruen mobilizazioa erraztea. Lege testuak neurriak jasotzen ditu eraikin publikoetan 2.000 bizitoki eskaintzeko eta erabiltzen ez diren 7.000 lokal etxebizitza babestu bihurtzeko. Tentsio handiko eremuak izendatzearen alde ere egin du Itxasok (dagoeneko EAEko biztanleriaren erdia bizi da eremu horietan), eta gogorarazi du toki horietan berritzen diren kontratuak prezio-mugen mende egongo direla.
Sailburuak, gainera, Europako Inbertsio Bankuak (BEI), Kreditu Ofizialeko Institutuak (ICO) eta kapital pribatuak parte hartuko duten etxebizitza-funts sozial bat sortuko dela iragarri du, “arrazoizko” zorpetze baten bidez arestian aipatutako babestutako beste 10.000 etxebizitza eraikitzeko. Aurreratu duenez, Eusko Jaurlaritza 2.000 milioi euro mobilizatzera bideratutako finantza tresna prestatzen ari da, eta uda baino lehen balizko bazkideei aurkeztea aurreikusten du. Era berean, datorren astean aurkeztuko duten Etxebizitza Eskuragarriaren Europako Planaren aurrean duen itxaropena azaldu du, finantza laguntza izatea espero baitu.
