Atzo bertan Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak 3.900 milioi euroko Euskadi 2030 Industria Plana aurkeztu bazuen, gaur Noël D’Anjou Ogasun eta Finantzetako sailburuak hartu du hitza: Euskadi Eraldatuz 2030 inbertsio-plana eman du aditzera.
Pradales Lehendakariaren eta Jauregi sailburuarekin batera egindako aurkezpenean, D’Anjouk zehaztu du kapital publikoko 1.000 milioi euro eta kapital pribatuko 3.000 milioi euro inbertituko direla, gutxienez, EAEko ekonomia eta industria eraldatzea helburu duen planera. Zehazki, hiru asmo konkretu ditu Euskadi Eraldatuz 2030 inbertsio-planak: enpresak EAEn errotzeko operazioetan laguntzea, enpresen hazkunderako aukerak baliatzea, eta kanpoko kapitala erakartzeko tresnak sustatzea.
1.000 milioi euro horiek bideratzeko lau bitarteko proposatu ditu Jaurlaritzak: Finantzen Euskal Institutua (150 milioi euro), Finkatuz funtsa (350 milioi), Indartuz funtsa (400 milioi) eta arrisku-kapitaleko funtsak (100 milioi). Bitarteko horiek “3.000 milioi euro gehiago erakartzeko palanka-efektua” ahalbidetuko dutela azaldu du Amaia del Villar Finantzen Euskal Institutuko zuzendari nagusiak.
Eusko Jaurlaritzak aurreikusi duenez, plan berriaren baitan garatuko diren tresnak 2026an zehar jarriko dira martxan, eta gaineratu dute ziurtatu egingo dela tresna horien inplementazioa egikaritzen dela, horretara bideratutako talde operatibo baten bitartez, atzo aurkeztutako industria planaren kasuan bezalaxe.
Plan berria garatzeko enpresen beharrak identifikatzen aritu da Jaurlaritza; EAEko testuingurua aztertu dute, eta nazioarteko “jardunbide onenetatik ikasi” dute, eskualdean ezarri daitezkeen tresnak ezagutzeko xedearekin. “Diagnostikoa dago, errezeta dago. Orain farmaziara joan behar dugu erostera. Herri gisa egin behar dugu bide hori, erantzukizun indibiduala eta kolektibo uztartuta. Publikoa eta pribatua, beti egin dugun bezalaxe. Herri etorkizuna dago jokoan, gure seme-alaben ogibidea dago jokoan”, esan du D'Anjou sailburuak.
Indartuz funsa eta arrisku funtsak
"Inbertitzaile zuzen eta funtsen-funts" gisa definitu du Pradalesek Indartuz funtsa, zeinari, hasiera batean behintzat, 400 milio euro esleituko zaizkion; inbertsio zuzen horrez gain, funtsen funts moduan funtzionatuko du.
Bestalde, bi arrisku funts berri iragarri ditu Jaurlaritzak, Handituz eta EZTEn II izenekoak. Biak ala biak enpresa txiki eta ertainen bideratutakoak izango dira eta, hurrenez hurren, hiru milioi eurotik beherako kapitala duten eta 50 milioi eurotik beherako kapitala duten start-upentzat izango dira.
