Gipuzkoako Foru Aldundiak berriro martxan jarri du lurraldeko enpresen zibersegurtasuna indartzeko dirulaguntza programa, guztira 400.000 euroko aurrekontuarekin. Ekonomia Sustapeneko eta Proiektu Estrategikoetako Sailak sustatutako ekimena ‘Gipuzkoa Digitala’ programaren barruan kokatzen da, eta Ziur Zibersegurtasun Industrialeko Zentroaren laguntzarekin eguneratu da, egungo erronketara egokitu asmoz.
Industria-sektorea, bereziki manufakturaren arloa, zibermehatxuen hazkundearen eraginpean dagoela nabarmendu du zentroak. Azken urteotan, sektorerik kaltetuena izan da, automatizazioaren menpekotasunagatik eta ekoizpenaren jarraikortasunaren garrantziagatik. Testuinguru horretan, enpresa txiki eta ertain askorentzat zibersegurtasuna beren jardueraren funtsezko elementu bihurtzen ari dira, "gero eta segurtasun digitaleko maila handiagoak eskatzen dituzten hornidura kate globaletan jarduten baitute".
Gauzak horrela, laguntza-programa bi ildotan egituratu da. Lehenengoak, 265.000 euroko zuzkidurarekin, enpresetan zibersegurtasuneko gaitasun aurreratuak garatzea du helburu, hala nola mehatxuen detekzio-sistemak ezartzea edo gorabeheren aurrean erantzuteko planak prestatzea. Bigarrenak, berriz, 135.000 euroko aurrekontua du, eta ekoizpen-prozesuak eta makinak kontrolatzen dituzten azpiegiturak eguneratu eta hobetzea bilatzen du.
Dirulaguntzen baldintzei dagokienez, lehen lerroak 20.000 eurorainoko laguntzak eskaintzen ditu, eta eskaerak aurkezteko epea irailaren 16ra arte egongo da zabalik. Bigarren lerroan, gehienez 30.000 euro jaso ahal izango dira, eta eskabideak maiatzaren 25a baino lehen aurkeztu beharko dira. Azken kasu horretan, laguntzaren ehunekoa handitu daiteke enpresak Ziurekin lankidetzan aritzeko konpromisoa hartzen badu proiektua garatzen den bitartean.