Ikuskizun eta ekitaldietako teknikariek greba egingo dute abuztuaren 5ean, 14an eta 26an, Gasteizko, Donostiako eta Bilboko jai nagusiekin bat eginez. Teknikariok, ESK, LAB, UGT, CCOO, ELA eta CNT sindikatuek astelehen honetan elkarretaratzea egin dute Gasteizen, sektorearentzako lehen hitzarmen kolektiboa eskatzeko eta, euren esanetan, salatzeko oinarrizko lan eskubideak etengabe urratzen direla "erabat arautu gabe" dagoen jardueran.
Sindikatuek adierazi dute patronalarekin izandako azken bilera duela urtebete izan zela eta ordutik negoziazioa berriz abiatzeko egindako saiakerek ez dutela emaitzarik izan. Horregatik, maiatzaren 15eko lanuztearen ondoren, udarako beste hiru greba egun deitu dituzte. Azaldu dutenez, "helburua ez da inoiz izan greba egitea", baizik eta "benetako hitzarmen bat sinatzea, gutxieneko lan baldintzak bermatzeko".
Langileen ordezkariek salatu dute administrazio publikoek, ekitaldien sustatzaile nagusi diren aldetik, ez dutela kontrolik egiten kontratatutako enpresetako lan baldintzen inguruan. Haien arabera, sektorean ohikoak dira behin-behinekotasuna, atsedenik gabeko lanaldi luzeak, jaiegun eta gaueko plusik eza, kontziliatzeko zailtasunak eta lan eskubideen urraketak. Era berean, hitzarmenean aurreikusi nahi dute langileek gutxienez sei aste lehenago jakitea lan egingo duten ala ez, eta txandak bi aste lehenago ezagutzea.
Arabako grebari dagokionez, sindikatuek Gasteizko Foruen plazako, Matxete plazako eta Probintzia plazako kontzertuak antolatzen dituzten enpresa adjudikaziodunak jo dituzte langileen prekarietatearen erantzule. Halaber, eskatu dute EAEn egiten diren jaialdi eta kontzertu handietan ere saihestea kanpoko enpresen bidez lan baldintzak okerrera egitea. Guztira 300 teknikari daude grebara deituta. Bestalde, txosnek abuztuaren 5ean, 14an eta 26an aurreikusitako kontzertuak bertan behera uzteko hartutako erabakia eskertu dute. Abuztuaren 5eko greba 06:00etatik hurrengo eguneko 06:00etara luzatuko da, eta arratsaldeko 18:00etan elkarretaratzea egingo dute Gasteizko Correos plazan.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta