2024ko irailean izendatu zuten Kontxi Claver Zurro Bilboko Udaleko Garapen Ekonomikoko, Merkataritzako, Turismoko eta Enpleguko zinegotzi. Hiriko ekintzailetzaren bilakaera, negozio txikien etorkizuna eta enpresa txiki nahiz ertainen egoeraz mintzatu da EnpresaBIDEArekin.
Zein da Bilboko ekintzailetzaren egungo egoera hirian eta zein faktore ari dira laguntzen ekintzailetza hori hazi ahal izateko?
Bilbo ingurune erakargarria da enpresa-proiektu berriak abian jarri nahi dituztenentzat, funtsezko hainbat faktoreri esker: kokapen estrategikoa, azpiegitura modernoak, etengabe hazten ari den ekosistema berritzailea eta erakundeen, enpresen eta ezagutza-zentroen arteko lankidetza estua.
Udaletik lan egiten dugu ekintzaileek espazio eta baliabide egokiak ez ezik, laguntza ere aurki dezaten beren egitasmoak garatzeko prozesu osoan zehar. Gure helburua da ideia onak proiektu bideragarri bihurtzea, jarduera ekonomikoa eta enplegua sortzeko. Gainera, gure hiriak gero eta gaitasun handiagoa du talentua eta inbertsioa erakartzeko, eta horrek gero eta dinamikoagoa, anitzagoa eta etorkizuneko erronkei aurre egiteko prestatuagoa den ekosistema ekintzailea indartzen du.
Eta prozesu honetan guztian funtsezko lana egiten dugu Bilbao Ekintza gure udal-sozietatearen bitartez, tresna horretatik era guztietako laguntza eta aholkularitza eskaintzen baitiegu ekin nahi dutenei, merkataritza hobetu nahi dutenei, enpresei... Gure ateak irekita daude beti.
Zein da Bilbao Ekintzaren aholkularitzara jotzen duten ekintzaileen eta enpresen profila?
Bilbao Ekintza Ekintzailetza Zentroan aholkularitza eskatzen duten pertsonek askotariko profilak dituzte, baina hurbileko negozio txikiei, merkataritzari, ostalaritzari, zerbitzu pertsonalei, aholkularitzari, kudeaketa-aholkularitzei, marketinari, publizitateari eta sormen-industriei lotutako ekimenen presentzia nabarmena dago.
Hiriaren dinamizazio ekonomiko eta sozialean funtsezko zeregina betetzen duten sektoreak dira, enplegua sortzen eta tokiko enpresa-sarea indartzen laguntzen dutenak. Gainera, gure zerbitzuetara jotzen duten ekintzaileen artean ere emakumeen presentzia nabarmena ikusten dugu: %56 emakumeak dira, eta datu horrek erakusten du gero eta protagonismo handiagoa dutela enpresa-proiektuen sorreran eta lidergoan.
Beste alderdi garrantzitsu bat da ekiten dutenen kualifikazio-maila handia. Erdiak baino gehiagok, zehazki %53k, goi-mailako ikasketak dituzte, eta horrek agerian uzten du Bilboko ekintzailetza gero eta lotuago dagoela talentuarekin, prestakuntzarekin eta espezializazioarekin.
Auzoko saltokiak edo oinarri teknologikoko start-upak bezalako proiektuak izaki, zer aholkularitza pertsonalizatuko zerbitzu eskaintzen diezue ekintzaileei beren negozioak sustatzen laguntzeko?
Enpresak sortzen laguntzeko ibilbide integrala eskaintzen dugu: zerbitzu aditu, pertsonalizatu eta tutorizatua hasieratik amaieraraino. Hasierako ideia negozio bideragarri bihurtzeko diseinatzen dugu, ahalik eta arrisku txikiena hartuz. Prozesuak laguntza pertsonalizatua du fase guztietan, eta ekintzailearen eta haren enpresa-proiektuaren sektorearen gaitasun-profilera egokitzen du. Prozesu integral bat da, ideia sortzen den hasierako egoeratik, enpresaren definiziotik, abian jartzeraino eta enpresaren ibilbidearen hasieraraino doana.
Zeharka, ibilbide horrek sektore-aholkularitza espezializatua du (bereziki sektore digital eta merkataritza-sektorera bideratua), enpresa-gaikuntzarako programak ditu zuzendaritza eta merkataritza gaitasunak eskuratzeko, eta zuzeneko laguntza ematen du laguntza ekonomikoen kudeaketan.
"Erdiak baino gehiagok, zehazki %53k, goi-mailako ikasketak dituzte, eta horrek agerian uzten du Bilboko ekintzailetza gero eta lotuago dagoela talentuarekin, prestakuntzarekin eta espezializazioarekin"
Eta hirian dauden saltokien ehuneko handia kontuan hartuta, zer aholkularitza eskaintzen zaie merkatariei?
Merkataritzaren eta ostalaritzaren sektorerako Merkataritza Sektoreko Ekintzailetza Programa dugu, hirian lokal bat ezarri nahi dutenentzat berariaz diseinatutako laguntza plana. Aholkularitza pertsonalizatuen bidez, digitalizazioan eta omnikanalitatean lan egiten dugu, online presentzia optimizatzeko eta denda fisikoaren eta webgunearen arteko erosketa-esperientzia integratua bermatzeko.
Laguntza hori osatzeko, merkataritza-kudeaketarako orientazioa eta espazio fisikoaren egokitzapenean espezializatutako zerbitzu bat daude, araudiei, epeei eta espazioetako barnealdeen diseinuari buruzko funtsezko informazioa ematen duena. Sektoreko tutoretza horrez gain, promotoreen gaitasunen garapena bultzatzen dugu, merkataritza nahiz zuzendaritza-gaitasunak eta branding estrategiak helburu dituzten banakako coaching saioen bidez.
Azkenik, hasierako fase horietako profil nagusia banako enpresariena dela dakigunez, Kafesarean esaten dioguna jartzen dugu zure eskura. Networkingeko gure enpresa-sare fisikoa da, ekintzaileen isolamenduari aurre egiten diona, hilero auzoetan bilerak eginez esperientziak partekatzeko eta tokiko negozioak bisitatzeko. Aholkularitza hori guztia Zabalguneko eraikinetik kudeatzen dugu. Beti esaten dut deitzeko, etortzeko eta gure profesional-taldearekin kontsulta egiteko.
Bilboko enpresa txiki edo ertain bat udaletxera joaten denean bere kudeaketa edo estrategia hobetzeko asmoz, zer laguntza mota aurkituko du?
ETEen Unitatetik kudeaketaz eta estrategiaz harago goaz, berrikuntza, barne-talentuaren garapena eta etengabeko hobekuntza bultzatzen dituen ikuspegi integral bat garatzen baitugu, enpresen trebakuntzaren, sektoreen profesionalizazioaren, digitalizazioaren eta prozesuen automatizazioaren bidez. Era berean, aholkularitza eskaintzen diegu enpresei funtsezko arlo guztietan (komunikazioa eta marketina, ekonomiko-finantzarioa, digitalizazioa eta giza baliabideak), baita hirigintza-araudian orientazioa, lizentziak eta Bilboko lokalen egokitzapena, espazio berrien ebaluazioa eta osasun-araudian eta babes zibilekoan laguntza ere.
Bilboko enpresa sarearen garapen ekonomikoa eta lehiakortasuna bultzatzea da gure helburu nagusia. Hori lortzeko, barne ekintzailetza, sendotzea eta hazkunde jasangarria bultzatzen ditugu, toki-erakundeekiko lankidetza programen bidez. Horrela, ekosistema egituratu, iraunkor, inklusibo eta digitalizatu bat sustatzen dugu, herritarren ongizateari laguntzeko eta Bilbo enpresa-dinamismoaren erreferente gisa kokatzeko.
Hiriaren eraldaketa ekonomikoaren eragileetako bat izan nahi dugu. Bilbo talentuarentzat, negozio aukerentzat eta ekonomia iraunkorrarentzat hiri berritzaile eta erakargarri gisa sendotzea da gure helburua, kalitatezko enplegua sortuz eta lankidetza publiko-pribatua indartuz.
"Bilbo talentuarentzat, negozio aukerentzat eta ekonomia iraunkorrarentzat hiri berritzaile eta erakargarri gisa sendotzea da gure helburua"
Zeintzuk dira ekonomia jasangarria sustatzeko ezarri dituzuen lan ildo nagusiak?
Esparru hau berriagoa da. Bilbao Ekintzatik egituraz egin dugu aurrera ildo horretan. Gaur egun, erreparazioen arloko enpresa prospekzioari buruzko azterlan bat dugu abian, sektore hori baita negozio-eredu iraunkorragoetarako trantsiziorako palanka nagusietako bat.
Ekimen honen bidez, Bilboko enpresa-sarearen egoera ezaugarritu nahi dugu ingurumen-eskakizunen, ekonomia zirkularraren eta Europako etorkizuneko araudiaren aurrean, eta horrela, ETEei eta saltokiei zuzendutako ekintza plan bat diseinatzeko oinarriak ezarriko dituzten behar, aukera eta jarduera-ildo espezifikoak identifikatu ahal izango ditugu.
Gainera, enpresa horiek zer profil edo belaunaldi errelebo behar dituzten jakiteko eta ehunaren errealitatera egokitutako kalitatezko zerbitzuak emateko aukera emango du.
Askotan, enpresa edo merkataritza proiektu bati ekin diotenek nolabaiteko bakardadea senti dezakete erabaki estrategikoak hartzeko edo negozio-eredua zehazterako orduan. Nola egiten duzue profesional horiek eraldaketa horri bakarka aurre egin behar ez izateko?
Hori egia da. Horretarako, Mentoring Bilbao programa dugu, hiru urte baino gehiagoko ibilbidea duten enpresei laguntzeko estrategia, enpresa horiek hazteko, sendotzeko edo eraldatzeko esperientzia eta funtsezko ezagutzak eskura ditzaten. Gure helburua da hausnarketa sakona egitea, parte hartzen duten enpresen epe luzerako ikuspegia hobetzeko eta erabakiak argiago, autonomiaz eta ikuspegi estrategikoz hartzeko gaitasuna indartzeko.
Programa esperientzia prozesu batean oinarritzen da. Ibilbide sendoa duen mentore batek laguntzen die enpresei. Hainbat egiteko ditu: gida estrategiko gisa jardutea, erronkak proposatzea, aktiboki entzutea eta perspektiba ematea, helburuak identifikatzea, funtsezko gaitasunak garatzea, errendimendua hobetzea, eta garapen pertsonal eta profesionalean aurrera egitea.
Programa horren garapenak zortzi hilabete inguru irauten du, eta zortzi eta hamar bilera indibidual arteko konpromisoa ezartzen da aholkulariaren eta enpresa parte-hartzaileen artean. Horren osagarri, programak jarraipen bilera teknikoak, parte-hartzaileen artean ikaskuntzak partekatzeko saioak eta lortutako emaitzen eta ikaskuntzen azken ebaluazioa biltzen ditu.
Enpresa-profesionalizazioa bultzatzeaz gain, Mentoring Bilbao programa honen bidez, mentore berriak progresiboki sartzea sustatzen da, bai eta kontaktu-sare bat sortzea ere, tokitik abiatuta Estatu mailara hedatu ahal izateko, mentoring ekosistema sendotuz eta enpresa parte-hartzaileen lankidetza eta hedapena erraztuz.
Belaunaldien arteko erreleboari dagokionez, hiriak bere jarduerari eutsi diezaion. Nola mantendu daitezke auzoko negozio txikiak? Eta zer neurri proposatzen dituzue merkataritza transmisioa bultzatzeko?
Gaur egun, bi adarretan egituratutako enpresa-transmisioko egitasmo batean ari gara lanean. Alde batetik, merkatariei jakinarazten ari gara beren lan jarduna amaitzear dagoela, eta beren ondarearekin jarraitu nahi duten beste pertsona batzuei eskualdatzeko aukera dutela. Horrela, merkatari askok jakiten dute itzulkin ekonomikoa lor dezaketela, behin betiko itxi beharrean, eta beren auzoei bizia eta jarduera ematen jarraitu.
Bestalde, arriskua murrizteko aukerak bilatzen dituzten ekintzaileen olatu berri bat antzeman dugu. Transferitzen ari den negozio bat eskuratzeak zerotik berri bat hasteak baino berme handiagoak eskaintzen ditu; izan ere, aurretiko egitura bat izango dute, urteetan arrakastatsua izan den negozio eredu bat. Oso bide interesgarria da, eta espero dugu emaitza ona izatea.
"Transferitzen ari den negozio bat eskuratzeak zerotik berri bat hasteak baino berme handiagoak eskaintzen ditu"
Bukatzeko, etorkizunera begira, zer erronka ditu Bilbok bere garapen ekonomikoari dagokionez?
Bilbok erronka garrantzitsuak ditu datozen urteetan bere garapen ekonomikoa sendotzeko. Ekoizpen sarearen dibertsifikazioan aurrera egitea da nagusietako bat, balio erantsi handiko sektoreen alde eginez, hala nola berrikuntza teknologikoa, industria aurreratua, ekonomia digitala edo trantsizio energetikoari lotutako jarduerak.
Aldi berean, talentua erakartzeko eta atxikitzeko gai izan behar dugu, batez ere gazteen artean, aukera profesional erakargarriak sortuz eta gure hirian proiektu pertsonalak eta profesionalak garatzea ahalbidetuko duten etxebizitza eta bizi baldintzak eskuratzeko aukera erraztuz.
Hazkunde jasangarrirako gakoak lehiakortasun ekonomikoa eta gizarte-kohesioa uztartzea dira. Aberastasuna sortuko duen ekonomia bat behar dugu, baina baita enplegu egonkorra eta kualifikatua ere. Horretarako, funtsezkoa da erakundeen, enpresen, unibertsitateen eta formazio zentroen arteko lankidetza indartzea. Bilbok eraldatzeko gaitasun handia erakutsi du azken hamarkadetan. Orain, erronka da ezagutzan, jasangarritasunean eta enpleguaren kalitatean oinarritutako hazkunde aldi berri bat gidatzea, aurrerapen ekonomikoak herritar guztien ongizatea ekarriko duela bermatuz.