Pasaiako Portu Agintaritzak (PPA) ibilgailu elektrikoentzako zortzi karga-puntu berri jarri ditu, 60.000 euroko inbertsioa egin ondoren. Kargagailuek 7,4 kW-eko potentzia dute, eta PPAren Transatlantiko Eraikinaren kanpoko aparkalekuan kokatu dira, baita arrantza-lonjaren barruko aparkalekuan ere.
Agintaritzak azaldu du portua mugikortasun iraunkorreko estrategia garatzen ari dela, eta, gainera, ibilgailu elektrikoaren erabilera gero eta ageriagoa dela. Eskaria igotzeaz gain, ibilgailu elektrikoaren erabilera sustatu nahi denez, portuak apustua egin du ibilgailu mota horien alde.
Izaskun Goñi PPAko presidenteak funtsezkotzat jo du karga-puntuak instalatzea, baliagarria izango delakoan portuko langileen artean “gidatze garbiagorako eta eraginkorragorako trantsizioa” sustatzeko. Horrez gain, David Candelario PPAko zuzendariak azaldu du mugikortasun jasangarriko estrategia dela-eta portuak 2026an zehar ibilgailu elektrikoen flota handitzea ere aurreikusten duela; izan ere, gaur egun hamar ibilgailu elektriko daude langileek soilik erabiltzeko.