Bizkaiko Pentsiodunen Mugimenduak manifestazioa egin du astelehen honetan Bilbon, Aste Nagusia probestuta, erosteko ahalmenaren galera salatzeko eta pentsioen sistema publikoaren alde egiteko. Pentsiodun guztientzako, eta emakumeentzako batez ere, "duinak, bidezkoak eta nahikoak" diren prestazioen aldeko aldarria egin dute.
Mobilizazioa Bilboko Aste Nagusiarekin bat eginik deitu dute, Jaietan ere, pentsionistak kalean lelopean. Martxa eguerdian abiatu da Plaza Eliptikotik, eta udaletxearen eta Areatzako txosnen esparruaren inguruan amaitu da. Amaieran, konpartsen txosnetan mokadua hartu, eta edaria soilik ordaindu dute.
Andrea Uña eta Jon Fano mugimenduko kideek kolektiboaren eskariak helarazi dituzte eta gogorarazi dute jaietan ere pentsioen sistema publikoa aldarrikatu nahi dutela eta inflazio handiak erosteko ahalmena galtzea ekarri diela. Zehaztu dutenez, aurten ia puntu bat galdu dute; uztailean KPIa %3,6 igo baita eta pentsioak, aldiz, %2,7.
Uñak azaldu du manifestazioaren helburua dela gobernuko alderdi nagusiei gogoraraztea irailaren 7tik aurrera kaleetara itzuliko direla beren eskaeren alde borrokan jarraitzeko; izan ere, nabarmendu duenez, "kaleetan jarraituko dugu duela urte batzuetako aldarrikapen berberak egiten, lortu ditugun eskubideak, kalean ez bagaude, galdu egingo baititugu".
Bestalde, Fanok azpimarratu du pentsio duin eta bidezkoen aldeko borrokaz gain, mugimenduak elkartasuna adierazten diela zaintzaren eta osasunaren sektoreko kideek eginiko eskakizunei, eta "inoiz baino gehiago, osasun eta zaintza sistema publiko duin eta unibertsala" eskatzen dutela guztientzat, adinekoengan eragin berezia duelako, besteak beste.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta