Udalhitzeko negoziazio-mahaia berriro bildu da gaur, bi hilabeteko etenaren ondoren. Uztaileko azken bileran egoera blokeatuta geratu zen, eta alderdi politikoek proposamen berriak aurkeztuko zituztela adierazi zuten. Sindikatuek, ordea, salatu dute gaurko bilerak ez duela aurrerapauso handirik ekarri. LABen arabera, Eudelek "konpromisorik gabeko asmo hipotetikoak" eta indarrean dauden legeetako edukiak baino ez ditu mahai gainean jarri; ELAk, berriz, Eudelek "negoziatzeko borondaterik ez duela" erakutsi duela dio.
Soldatei dagokienez, bi sindikatuek nabarmendu dute ez dagoela erosteko ahalmenaren galera konpontzeko proposamen zehatzik, negoziazioa duela ia bi urte hasi bazen ere. LABek, gainera, soldatak berreskuratzeko eta erosahalmena bermatzeko tresnak adostu beharra aipatu du. Euskarari dagokionez, ELAk eta LABek eskatu dute bi hizkuntza ofizialen parekotasuna bermatzeko neurri zehatzak jasotzea.
Subrogazioa ere eztabaidagai nagusietako bat izan da. Eudelek ez du eskubide hori bermatzen, sindikatuen arabera, eta eskatu dute subrogazioa lan-hitzarmenean jasotzea, langileen enplegua babesteko. EH Bilduk proposamen bat aurkeztu du gai horri dagokionez, eta ELAk zein LABek adierazi dute aztertzeke dagoela. Lanaldi partzialari dagokionez, LABek proposatu du langileen %10ek baino gehiagok ez izatea lanaldi mota hori, eta, bereziki emakumeak nagusi diren sektoreetan, lanaldi partzialeko kontratuak lanaldi osoko kontratu bihurtzea, langile horiek %100eko lanaldia izan dezaten.
Langileen erreleboari dagokionez, Eudelek Eusko Jaurlaritzaren Gazteberritze plana proposatu du, baina ELAk kritikatu du neurria negoziaziorik gabe planteatu izana, eta langile zaharrenen erretiroarekin batera langile berrien sarrera ahalbidetzeko txanda-kontratuei buruz ere negoziatu beharra azpimarratu du. LABek, bestalde, Jaurlaritzako langileentzat adostutako Belaunaldien Erreleborako plana udalentzat eredu izatea lortu duela azaldu du. Hurrengo negoziazio-mahaia irailaren 25ean egingo da, baina sindikatuek mobilizazioei eutsiko dietela iragarri dute: irailaren 24an tokiko mobilizazioak egingo dituzte eta urriaren 8rako greba deialdia egingo da udal eta tokiko administrazioetako langileentzat.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta