Ziurgabetasun ekonomikoaren testuingurua nola nabigatu asmatzen ari da, antza, Laboral Kutxa. Dezelerazio ziklikoak, merkataritza-tentsio berrituak eta ezkutuko arrisku geopolitikoak bat egin badute ere, Mondragon taldeko kreditu kooperatibak 145,5 milioiko irabazi garbi bateratua lortu du 2025eko lehen seihilekoan. Izan ere, negozio-lerro nagusietan hazi egin da: hipoteka-kredituetan %49 egin du gora, eta merkataritzako kreditu-inbertsioaren alorrean nabarmen hazi dira inbertsio berria (%7,6) eta saldoak (%3,7).
Ohiko banku negozioan, beraz, oro har emaitza egokiak lortu ditu Laboral Kutxak. Interes-marjina 295,4 milioi euroan kokatu da epe horretan, eta inbertsio-zerbitzuetan %2,2 egin dute gora zerbitzuen ondoriozko komisioen diru-sarrera garbiek —69,6 milioi euroraino—. Berezoak oinarrizko komisioetatik salbuesteko apustuari erreparatuta, 365 milioi eurokoa izan da oinarrizko marjina, %7,23 jaitsita.
Inbertsio-funtsen ondarean ere antzematen da hazkundea, %15,9 egin baitu gora.
Zuhurtzia nagusi
Zuhurtziaz jokatzeari esker, entitatearen kreditu-inbertsioa "kalitate handikoa" dela adierazi dute Laboral Kutxatik, eta ez dutela zalantzazko zorroak hirugarrenei saltzeko premiarik. Berankortasunak behera egiten jarraitu du seihilekoan, eta ekainaren amaieran %2,32an kokatu da. Sektoreko batez bestekoaren azpitik dago beraz, % 3,01ekoa izan baitzen maiatza bukaeran.
Era berean, balizko narriadurak estaltzeko asmoz balantzean jaso den funtsen proportzioa % 85,66ra iritsi da ekainaren bukaeran estaldura tasari dagokionez.
Aurrezkien bilakaera
Laboral Kutxaren bitartekotutako baliabideak 32.793 milioi eurora iritsi dira 2025eko lehen seihilekoaren amaieran, urte hasieratik 1.362 milioi euroko hazkundea izanik (%4,33 gehiago abendutik).
Baliabide horien artean, familien eta enpresen balantze barruko gordailuak aipatu behar dira, ageriko kontuak, aurrezki-kontuak eta eperako gordailuak, alegia. %1,52 hazi dira.
Balantzetik kanpoko baliabideei dagokienez, inbertsio-funtsen alorrean bilakaera nabarmena izan da, bezeroek Laboral Kutxaren inbertsio-zerbitzuei emandako konfiantzaren adierazgarri. Lehen seihilekoan, entitateak kudeatutako ondarea 985 milioi euro hazi da, hau da, % 15,91.
Balantzetik kanpoko gainerako produktu multzoak ere —BGAEak, pentsio-planak, bizi- eta aurrezki-aseguruak— hazkunde nabarmena izan dute, guztira % 11,91ko igoerarekin.