Greba partzialak deitu ditu Transports Ciutat Comtaleko (TCC) enpresa batzordeak honako egun hauetan: irailaren 9, 11, 15, 17, 19, 22, 24 eta 26. Ondorioz, egun horietan bi ordu eta erdiz (06:00etatik 08:30era) %60koa izango da zerbitzua, eta, kalkuluen arabera, 83.000 bidaiengan izango du eragina.
Biharkoa ez da lehenengo greba eguna izango Billabesa Iruñerriko Eskualdeko Hiri Garraioa kudeatzen duen TCC enpresako langileentzat, izan ere, uztailean ere lanuzteak antolatu zituzten. Enpresa batzordeak KPIaren araberako soldata igoerak eta lan baldintzak hobetzea eskatu zuen, baina zuzendaritzak ez zuen “proposamen errealik” iradoki, hitzarmen kolektiboa adostea oztopatuta.
Uztailaren 14an amaitu ziren greba egun horien ondoren, lanuzteak berraktibatzea erabaki dute langileek, nahiz eta enpresa erabakiaren aurka irmoki agertu. Zuzendaritzak salatu du enpresa batzordeak ez diola plantillari utzi Nafarroako Lan Auzitegiak eskainitako azken proposamena bozkatzen, eta, hortaz, enplegatuak “isilarazi” dituztela. Eskaintzak gaueko plusak gehitzea, gertakari arruntengatiko prestazioak hobetzea, norberaren kontuetarako laugarren egun bat ezartzea eta beste zenbait neurri barne hartzen zituen. “Iruñeko eta Iruñerriako herritarrek garraio publiko fidagarria eta duina merezi dute”, gaineratu dute.
Enpresa batzordeak, ordea, ez du nahikotzat jo proposamena, uztailean eskainitakoaren aldean aurrerapausorik eman ez delako.