2000an, etxeetan ez zegoen kasik ordenagailurik, ezta Internet konexiorik ere. Marketin digitala ez zen existitzen, eta enpresek ez zuten presentziarik sarean. Testuinguru honetan, ziberkafetegi bat sortu zuen Iñaki Garciak, Lin3seko fundatzaile eta zuzendariak. “Negozio hau muntatzean ohartu ginen zer zen Internet, eta zer izan zitekeen etorkizunean enpresa zein zerbitzu arloko erakunde guztientzat”.
Bi urte beranduago sortu zen ofizialki egun Lin3s izenez ezagutzen den agentzia. “Gure bezeroen negozioak hobetzen saiatzen gara”, azaldu du Garciak. Marketin digitala, analitika eta datu zerbitzuak, diseinua eta teknologia arloko aholkularitza eskaintzen ditu, baita formakuntza ere. Dena den, hasieran batean, web-orrien diseinu eta garapenak jorratzen zituen soilik. “2006-2007 inguruan, helburua web-orriak egitea baino, bezeroarentzat erakargarria zen edukiak sortzea zela ohartu ginen”. Hala, marketin digitalaren munduan sartzeko hautua egin zuten. “Bezeroen aktibo digitalen eskaria erakartzeaz gain, bezeroen salmentak areagotzea bihurtzen da jomuga, hau da, errentagarri bilakatzea eta euren negozio digitaleko aspektu guztiak jorratzea”.
Hasieran batean, web-orrien diseinu eta garapenak jorratzen zituen soilik. Gerora, marketin digitalaren munduan sartzeko hautua egin zuten.
Ehun bat langile ditu Lin3sek egun. Lehen urteetan hainbat ezagutza alorretan antolatzen ziren lankideak; orain, ordea, lan talde txikiagotan. “Proiektu eta pertsona gehiagorekin lanean hasi ginenean, lan talde txikiagoko antolakuntza egin genuen. Zortzi talde ditugu, bakoitza arlo zehatz batean espezializatua, hala nola kultura, bankua, moda edota higiezinen enpresak”, nabarmendu du agentziaren fundatzaileak. Bestalde, zeharkako zenbait talde ere badituzte, gaitasun teknikoagoak dituztenak; garapena, programazioa eta teknologia zerbitzuak emateaz arduratzen direnak, hain zuzen.
Bezero bakoitzaren bidelagun
Guggenheim museoak antolatutako lehiaketa irabazi zuen Lin3sek proiektuaren hastapenetan, eta Garciaren aburuz, momentu hura izan zen enpresak hazteko behar zuen bultzada. “Enpresa lokal txiki bat ginen garai hartan, eta lehiaketa irabazteak enpresa gisa haztera behartu gintuen”. Gerora, proiektu ugari ondu dituzte era guztietako enpresa eta erakundeekin: Barakaldo Vet Shop, Saunier Duval, Deustuko Unibertsitatea, Euskalduna jauregia, Etxeondo, Laboral Kutxa, Forum Sport, Azkuna Zentroa edota Universitat Oberta de Catalunyarekin (UOC), besteak beste. Athletic Club futbol taldearekin ere kolaboratzen aritu dira, non klubaren transformazio digital osoa gauzatu duten, baita denda eta web-orri berria muntatu eta arlo analitikoan lagundu ere.
Iñaki Garcia: “Bezeroarekin urtez urte garatzen doan proiektua da guretzat idealena. Jada ezagutzen dituzun bezeroei eboluzionatzen laguntzea"
Denera, 12 negozio-espezialitate ditu enpresak. “Bezeroarekin urtez urte garatzen doan proiektua da guretzat idealena. Jada ezagutzen dituzun bezeroei eboluzionatzen laguntzea”. Hein horretan, Lin3s ez da arazo edo kasuistika jakin baten soluzioa bilatzen duen enpresa, alegia, epe luzeko harremana bilatzen du bezero bakoitzarekin. “Bezeroa ezagutzen zoazenean eta soluzioak ematen hasten zarenean sortzen da magia. Euren negozioa hazten laguntzea da gakoa, marketin digitalean, eskaria areagotzen eta erabiltzaileari esperientzia berriak emanez”, azpimarratu du Garciak.
Formakuntzari dagokionez, Lin3sek hainbat unibertsitateekin kolaboratu du klaseak emanez eta zenbait masterretan parte hartuz. Euren programa propioak ere antolatzen dituzte. “Formakuntza guztia online egiten dugu. Pandemia aurretik, Bilbon, Madrilen eta Bartzelona ematen genituen kurtsoak, Deustuko Unibertsitatean, Complutensen eta Pompeu Fabran, hurrenez hurren”, adierazi du.
Sektore dinamiko eta gazte batean
“Gure jarduera aholkularitzara bideratzen ari gara. Ez dugu lan zehatz bat gauzatu nahi soilik, baizik eta bezero bakoitzaren negozioan lagundu nahi dugu. Hau da, euren negozioko bisio eta planifikazioaren parte izan”, azaldu du Garciak. Plan estrategiko berria lantzen dihardute buru-belarri, eta aholkularitzan zentratzeaz gain, enpresaren beste erronka estrategiko bat zera da: bezeroei euren ekipo propioak sortzen laguntzea. Enpresako fundatzailearen esanetan, gero eta enpresa gehiago ari dira marketin digital arloko profesionalak bilatzen. “Gure bezeroak gure agentziara halako profil profesionalen bila datoz, baina gauza aldatzen ari da”.
Iñaki Garcia: “Duela 20 urte ez zen sektore hau existitzen. Bertan hasi ginenok ez dugu inolako oinordekotzarik jaso ez eta aurreko belaunaldien egiteko modurik ere”
Hazteko aukera asko dituen sektore batean daudela aitortu du Garciak, baina badaki merkatua zail egiten duen zenbait ezaugarri ere daudela. “Dinamikoa izateaz gain, sektore gaztea ere bada. Duela 20 urte ez zen existitzen. Bertan hasi ginenok ez dugu inolako oinordekotzarik jaso, ezta aurreko belaunaldien egiteko modurik ere. Hau da, denak guk asmatu behar izan dugu, gure burua eta jarduera guk geuk eraiki dugu”.
Agentziak hogei urte hauetan izandako arrakastaren atzean hiru arrazoi nagusi daudela uste du zuzendariak: negozio ikuspegia izatea, sektorera egokitzen jakitea eta ikasteko eduki duten gogoa eta prestutasuna. “Urtero enpresa desberdin batean lan egitea bezala da Lin3sen lan egitea esan zidan behin sei urtez gure enpresan aritu zen lankide batek”, gehitu du zuzendariak.