Gureak taldeak 2025eko ekitaldia helburu nagusiak beteta itxi du, nahiz eta testuinguru ekonomikoa "ezegonkorra" izan. Guztira 6.054 lagunek osatu dute lantaldea, eta horien %83k desgaitasunen bat dute. Urteko fakturazioa 260 milioi eurokoa izan da, eta enpresa-taldeko dibisio guztiek emaitza positiboak eskuratu dituzte.
Josean Idoeta presidenteak gogoratu duenez, iaz 50 urte bete zituen erakundeak, eta urteurrena baliatu dute gizarteratze-ereduari balioa emateko. Gainera, nabarmendu du azken urteetan 6.000 langiletik gorako taldea mantentzea izan dela erronka nagusietako bat. Gaur egun, plantillaren %57k laguntza-premia handiak ditu, eta Idoetak azpimarratu duenez, “paregabea da lantaldearen erdia baino gehiago laguntza-premia handiak dituzten pertsonez osatutako enpresa izatea Europan”.
Era berean, zuzendaritzak ohartarazi du inklusioa "erronka partekatua" dela eta administrazio publikoen zein enpresa-sarearen babesa beharrezkoa dela. Horretarako, Inklusioanbat "programa berritzailea" jarri dute martxan, enpresei aholkularitza eskaintzeko. Besteak beste, Ulma Packaging, Eroski eta Real Sociedad dira dagoeneko egitasmoan parte hartzen duten erreferenteak.
Dibertsifikazioa izan da 2025eko giltza. Are gehiago, azken urteko fakturazioaren %32 duela bost urte existitzen ez ziren bezero, proiektu edo zerbitzuei lotuta egon da. Industria arloan, automobilgintzaren eraldaketari aurre egiteko beste sektore batzuetara zabaldu dira; zerbitzuen dibisioan lizitazio ugari landu dira, eta Datapostek eraldaketa digitala bizkortu du, adimen artifizialean oinarritutako soluzioekin eta 50 lanpostu berri sortuta. 2026rako, 10,8 milioi euroko inbertsioak aurreikusi dituzte, instalazioak eta ekipamendua berritzeko, sortutako soberakin guztiak proiektuan berrinbertituz.