Donostiako Multiverse Computingek eta AEBetako Qualcomm Technologies enpresak lankidetza hitzarmena iragarri dute mundu osoko datu-zentroetara adimen artifizialeko eredu eraginkorragoak eramateko. Akordioaren bidez, Multiverse Computingen AA ereduak Qualcomm Dragonfly AI200 eta AI250 plataformetara egokituko dira.
Bi enpresek azaldu dutenez, lankidetzak aukera emango die datu-zentroetako operadoreei errendimendu handiagoz eta energia gutxiago kontsumituta exekutatzeko eskala handiko adimen artifizialeko lan-kargak. Horrez gain, ereduek memoria eta konputazio baliabide gutxiago beharko dituztenez, azpiegitura bera erabilita eskaera gehiago kudeatu edo hainbat eredu aldi berean exekutatu ahal izango dira.
Lankidetzaren emaitzetako batzuk MWC Barcelona 2026 ekitaldian erakutsi zituzten. Larrialdietako txosten medikoak denbora errealean sortzeko kasu batean, eredu konprimituak erantzun-denborak %93 bizkortu, errendimendua %44 handitu eta memoria erabilera %45 nahiz energia kontsumoa %21 murriztu zituen, zehaztasuna galdu gabe. Bigarren erakustaldian, finantza-dokumentu konfidentzialak kontsultatzeko txatbot batek %35 azkarrago jardun zuen, errendimendua %54 hobetu, memoria erabilera %45 murriztu eta energia kontsumoa %14 jaitsi zuen.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta