Merkatuaren dezelerazioak eta kanpoko faktoreen presioak markatutako ekitaldian, Tubacexek irabaziak eta salmentak murriztu zituen 2025ean. Konpainiak 15,9 milioi euroko mozkin garbi doituarekin itxi zuen 2025a, hau da, %30,5eko beherakada izan zuen aurreko urtearekin alderatuta. Fakturazio bateratuak ere behera egin zuen, %6,3, 719,3 milioi euroetaraino, "merkatuaren ahultasun orokorra eta maila globalean izan den bolumenen beherakadak eraginda, bereziki balio erantsi txikiena duten produktuetan". Konpainiak, gainera, dolarraren kanbio-tasak izan duen eragin negatiboa eta nikelaren batez besteko prezioaren jaitsiera aipatu ditu.
Hala eta guztiz ere, emaitza operatiboa nahiko egonkor mantendu zen. Ebitda doitua 105,8 milioira iritsi zen, 2024an baino %1,1 gutxiago, eta marjina %14,7raino hobetu zen. Ebit doitua 58,3 milioikoa izan zen, %8,3ko jaitsierarekin. Enpresak balio erantsi handiko produktuen pisu handiagoari eta kostuen kontrolari egozten dio portaera hori.
Bestalde, taldeak 6,4 milioi euroko dibidendua banatzea proposatuko dio akziodunen batzarrari, hau da, mozkin garbi doituaren %40ko pay-outa. 2026ko urtarrilean jakinarazitako aparteko kontabilitate-doikuntzarik sartu gabe aurkeztu dira kontuak, kutxan eraginik izan gabe.
Finantza-zor garbia 344,8 milioikoa izan zen ekitaldiaren amaieran, eta ratioa 3,3 aldiz Ebitda doitua izan zen, proiektu estrategikoei lotutako kapital zirkulatzailearen igoerek eraginda. Horien artean, ADNOCekin egindako kontratua nabarmendu du Tubacexek; zirkulatzaile-beharrak handitu zituen aldi baterako, eta 82,3 milioiko bateratutako inpaktua eragin du. Eskaera-zorroa 1.233 milioi euroan kokatu dela adierazi du konpainiak.
2026ra begira, ziurgabetasun makroekonomiko eta geopolitikoaren aurrean “ikuspegi zuhurra” mantentzen du Tubacexek. Haren lehentasunak dira kutxaren sorrera indartzea, kapital zirkulatzailea kontrolatzea eta errentagarritasun handiagoko proiektuak hautatzea, ingurune lurrunkor batean hazkunde jasangarria ziurtatzeko helburuarekin.