Tubos Reunidosek hartzekodunen borondatezko konkurtsoa eskatu zuen atzo Arabako epaitegian, likidezia arazoek eta Amurrioko lantegiaren geldialdiak bultzatutako “berehalako kaudimengabezia” egoerari erantzuna eman asmoz. Balore Merkatuaren Batzorde Nazionalak (CNMV) berehala eten zuen bere akzioen negoziazioa, merkatuaren garapen normalari eragiten dioten inguruabarrak daudela iritzita.
Azken hilabeteotan diruzaintzan pilatutako tentsioengatik hartu du erabakia konpainiak. Tentsio horiek areagotu egin dira jardueraren beherakadagatik eta bideragarritasunari eusteko behar adina diru-sarrera ez izateagatik. Taldeak konpainiaren jarraipena bermatzeko plana ezarri zuen arren, onartu du ezin izan dituela beharrezko baldintzak ziurtatu, bereziki finantzazioari dagokionez.
Konkurtso prozesuak zalantzazko agertokia ireki dio orain enpresari, 118 milioi euroko galerak eta 263 milioitik gorako zorra baitakartza. Horrez gain, lan-gatazka pil-pilean dago, 240 langileri eragiten dien enplegu-erregulazioko espedientea aurkeztu eta Arabako altzairutegia itxi izanaren harira.
Iragarpenaren ostean, zuzendaritzak Amurrio eta Trapagarango enpresa batzordeak deitu zituen maiatzaren 6rako, egoerari heldu eta langileen zalantzei erantzuteko asmoz. UGTren ustez, neurria “albiste txarra” da, eta “errealitatearekin talka egiten du”; CCOOk , berriz, ohartarazi du konkurtsoak “ziurgabetasun handiagoa eta enplegurako arrisku handiagoa” sortzen dituela, langileek beren etorkizunari buruz erabakitzeko duten gaitasuna murrizteaz gain.
Eusko Jaurlaritzatik, Mikel Jauregi sailburuak bere babesa helarazi zien atzo langileei, eta adierazi zuen "etapa berri bat” hasiko dela, non jarduera industrialari eta enpleguari eustea lehenetsi behar den, zorra berregituratzearekin eta inbertitzaileak bilatzearekin batera. Bien bitartean, Amurrioko langileek grebarekin jarraitzea eztabaidatuko dute maiatzaren 7an, tentsio sindikalak eta enpresaren etorkizunari buruzko ziurgabetasunak oinarri izango dituen batzarrean.