Vidralak %13 handitu ditu irabaziak urteko lehen hiruhilekoan. Beirazko edukiontziak ekoizten dituen konpainiak 53,7 milioi euroko mozkin garbiak izan ditu: akzioko 1,53 euro.
Konpainiaren ebitda zertxobait murriztu bada ere (%0,6 egin du behera: 104 milioi euro), salmenten gaineko marjina %28,3 handitu da, enpresaren arabera, “kostuen gaineko kontrol hobea” egin duelako.
Orotara, martxora arte 367,5 milioi euroko fakturazioa izan du Vidralak, iazko epe berean baino %1,3 gutxiago.
Ekialde Hurbileko gatazkak baldintzatuko testuinguruan, konpainiak aitortu du Europa eta Erresuma Batuko eskariak behera egin duela, eta emaitza Hego Amerikan izandako hazkundeak eragin duela batik bat.
Enpresak 2024an ekin zion Hego Amerikako hedatze planari, eta egun ekoizpen plantak ditu Brasilen eta Txilen. Salmenten %20 bertan egin ditu.
Bestalde, Laudioko enpresaren zorra 273,1 milioi eurokoa da egun.
Raul Gomez Vidralako zuzendari orokorrak azaldu du egungo emaitzak erakusten dutela enpresak “etorkizun egonkorra” duela. Gauzak horrela, Vidralak aurreikusten du aurten akzio bakoitzeko irabaziak %5 handitzea.