Vidralak autokontsumorako planta fotovoltaikoa inauguratu du Laudioko lantegian, Mikel Jauregi Eusko Jaurlaritzako Industria, Trantsizio Energetiko eta Jasangarritasun sailburuarekin eta Irantzu Allende Trantsizio Energetikoko sailburuordearekin batera. Instalazio berriak 7 MW-eko potentzia du, 30.000 metro koadroko azalerarekin, eta 3,2 milioi euroko inbertsioa egin behar izan da azpiegitura instalatzeko. Horren %25 Eusko Jaurlaritzaren autokontsumorako laguntza-programaren bidez finantzatu da, Energiaren Euskal Erakundearen (EEE) bitartez.
Azpiegiturari esker, Laudioko lantegiak energia berriztagarri gehiago erabiliko du bere ekoizpen-prozesuan. Urtero 500 milioi beirazko ontzi baino gehiago ekoizten dituen fabrikak aurreikusten du urtean 1.909 tona CO2 gutxiago isurtzea. Jauregiren esanetan, horrelako proiektuek EAEren energia-autonomia indartzen laguntzen dute, eta nabarmendu du azken urteetan autokontsumorako instalatutako potentziak gora egin duela.
Bestalde, Vidralako zuzendari nagusi Raúl Gómezek adierazi du euskal industriak hainbat erronkari egin behar diela aurre, besteak beste, energia-kostuen igoerari, araudiari eta lan-gatazkei lotutakoei. Hori dela eta, ezinbestekotzat jo ditu energia-burujabetzaren aldeko inbertsioak eta administrazioekin lankidetza, eta azpimarratu du ingurumen-jasangarritasunaren aldeko apustuak ahalegin ekonomiko handiagoa eskatzen duela.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta