Paperetik ekintzara: berdintasuna aukera estrategiko gisa

Berdintasun plana kontzeptua enpresa askoren hiztegian eta estrategian txertatuta dago jada. Albiste ona da, zalantzarik gabe, kontzientziazio maila bat erakusten duelako. Baina 30 urteko esperientziak eta nire ibilbideak erakutsi dit paperak ez duela berez errealitatea eraldatzen; pertsonok egiten dugu. Gaurkoan ez dut fokua jarri nahi betetzen ez den horretan, baizik eta aurrean dugun aukera izugarrian: berdintasuna ez da bete beharreko tramite burokratikoa, enpresak aberasteko, talentua benetan aprobetxatzeko eta gizarte bidezkoago bat eraikitzeko palanka estrategikoa baizik.

Guk, emakume ekintzaileok, abantaila lehiakor bat dugu: gure proiektuetan arauak hutsetik idazteko boterea dugu. Asko gara egitura zurrunetatik irten eta gure balioekin bat datozen espazioak sortu ditugunak. EmakumeEkinen argi ikusten dugu hori egunero: berdintasuna ez da dekretuz ezartzen den zerbait, egunerokoan lantzen den jarrera bat baizik. Gure elkartean frogatu dugu konfiantzan, "epaiketarik gabean" eta elkarrekiko laguntzan oinarritutako sareak ehuntzea dela gakoa.

Hau da gure aldarrikapena: berdintasun plan eraginkorrena kultura enpresariala aldatzen duena da. Ez da soilik zenbakiak orekatzea; emakumeon ikusgarritasuna bermatzea, erreferente sendoak sortzea eta bidea elkarri erraztea da. Enpresa munduan askotan falta izan den "kalitatea eta berotasuna" uztartzea posible dela erakusten ari gara. Saretzeak eta akonpainamenduak indartsuago egiten gaituzte, eta indar hori gure negozioetara eramaten dugunean, ingurunea eraldatzen dugu.

Beraz, ikuspegi positibo eta eraikitzaile batetik diot: berdintasun planak beharrezkoak dira, bai, baina abiapuntua besterik ez dira. Benetako iraultza gure esku dago, gure lidergo ereduan. Gonbidapena luzatzen dizuet planak apalategitik atera eta bizitzaz betetzeko. Ez dezagun berdintasuna "eskatu" edo "itxaron"; har dezagun lidergoa eta "egikaritu" dezagun gure eguneroko erabakiekin. Erakuts dezagun, gure enpresen bidez, berdintasuna dela berrikuntzarik onena. Hori da etorkizuneko enpresa eredua, eta guk, emakumeok, eraiki dezakegu.