Pasaiako portuak jakinarazi du sare elektrikoa modernizatuko duela, jasangarritasunarekiko duten konpromisoa dela eta. Izan ere, Pasaiako Portu Agintaritzak (PPA) Onshore Power Supply (OPS) izeneko teknologia berriztagarria dartsenetara iristea nahi du solteko gaiak garraiatzen dituzten ontzientzat, egungo behe-tentsioko instalazioa egokituta. Hala, ontzi horiek OPS karga-estazioetara konektatu ahal izango dira.
Teknologia mota horrek aukera ematen die portuan geldirik dauden ontziei sare elektrikora konektatzeko, karga-estazioen bitartez; horrek ahalbidetzen du ontziek emisio kutsatzaileak eta zarata murriztea.
Solteko gaien itsasontziek 25 kW-tik 100 kW-ra bitarteko potentzia behar izaten dute, eta David Candelario PPAko zuzendariak azaldu du beharrezkoa dela portuko koadro elektriko orokorrak berritzea, itsasontziak portutik elikatu ahal izateko.
Espero da lanak udazkenerako amaitzea, eta horretarako 768.000 euro erabiliko dira, Europar Batasuneko Eskualde Garapeneko Europako Funtsaren (FEDER 4) bitartez finantzatuta. Proiektua POPE programaren barruan kokatzen da, “funtsezko tresna” portuen iraunkortasuna eta konektagarritasuna sustatzeko.