Eusko Jaurlaritzaren Gobernu Kontseiluak pasa den hilabetean onartu zuen 2027ko Aurrekontu Orokorren proiektua, 17.629 milioi euroko gastua aurreikusita, urte arteko %7,6ko hazkundearekin. Aurreko astean aurkeztu zituen Nöel D'Anjou Ogasun eta Finantza sailburuak aurrekontuen nondik norakoak Eusko Legebiltzarrean, eta azaroaren 2tik 4ra bitartean sailez sail aletu zituzten zenbatekoak. EAJ eta PSE-EEk osatutako Gobernu Kontseiluak ez du gainerako alderdi politikoen babesik behar aurrekontuak onartzeko, baina hala ere, gaur hasi da lehen bilera-erronda Sumar, PP eta Bildu taldeekin, aurrekontuetarako babes ahalik eta handiena lortu asmoz. Abenduaren 21a izango da azken eguna aurrekontuak onartzeko.
"Hauteskunde aurreko testuingurua kontuan hartuta, oposizioko alderdiei eskatzen dieguna da arduraz jokatzeko, zarata politikotik aldentzeko eta EAErentzat benetan garrantzitsua den horretan zentratzeko, hau da, euskal herritarrengan", adierazi du D'Anjouk, oposizioko taldeekin bilerak izan baino lehen.
Sumar: etxebizitza lehentasun
D'Anjou sailburua Sumar taldeko ordezkariekin elkartu da lehenik. Taldeko Jon Hernández parlamentariak adierazi du "oso zaila" izango dela akordioa lortzea Eusko Jaurlaritzarekin, bi taldeen artean alde handiak daudelako, bai aurrekontuko partidetan, bai eredu ekonomikoan. Sumarrek etxebizitza jarri du lehentasunen artean, eta ohartarazi du ez dituela babestuko etxebizitza krisiari erantzuteko neurrietan "guztiz zentratuta" ez dauden kontuak. Horrez gain, zerbitzu publikoetarako baliabide gehiago eta haien publifikazioa, enpresen gaineko zerga handitzea eta garraio publikoan doakotasunean pausuak ematea proposatu du. Hernándezek kritikatu du, halaber, Etxebizitza Sailaren aurrekontua iazkoaren parekoa izatea, eta aurrekontuen negoziazioak "oso ibilbide txikia" izango duela aurreikusi du.
PPrekin negoziaziorik ez
Javier de Andrés PP taldeko EAEko presidentea izan da D'Anjou sailburuarekin biltzen bigarrena. Alderdiko buruak argi utzi du bere alderdiak ez dituela 2027ko aurrekontuak negoziatuko, Eusko Jaurlaritzarengan "konfiantzarik" ez duela eta bere eredu ekonomikoarekin bat ez datorrela iritzita. De Andrések aurrekontuak %7,6ko igoera izatea kritikatu du, EAErako aurreikusitako %1,9ko hazkunde ekonomikoaren aurrean, eta igoera hori langileen eta familien eskutik finantzatuko dela salatu du, zerbitzu publikoek okerrera egiten duten bitartean. Hori dela eta, baztertu egin du bere ustez dirua ondo erabiltzen ez duen Gobernu baten kontuak babestea.
EH Bilduri "oso zaila" iruditzen zaio akordioa lortzea
Sumarren antzera, EH Bilduk ere "oso zaila" deritzo aurrekontuen negoziazioetan akordiorik erdiesteari. Pello Otxandiano bozeramailearen hitzetan, aurrekontuen proiektua "itxita" dago jada, eta "maniobrak egiteko marjina hutsala" da.
Otxandianok zalantzan jarri du Jaurlaritzaren benetako negoziatzeko borondatea, eta kritikatu egin du oposizioarekin harremanetan jartzeko aurrekontu-proiektua onartu arte itxaron izana. EH Bilduk hiru arlotan aurkeztu ditu proposamenak: etxebizitza publikoaren sustapena indartzea, bizi-kostuaren garestitzeari aurre egitea eta klima-aldaketara egokitzeko baliabide gehiago bideratzea. Etxebizitzari dagokionez, bereziki kritikatu ditu Etxebizitza Funts Sozialerako aurreikusitako 20 milioi euroak, "nahikoak ez direla" iritzita. Gainera, Eusko Jaurlaritzako aurrekontuak eta foru aldundienak batera negoziatzea proposatu du, erakundeen arteko lehentasunak bateratzeko eta baliabide publikoak eraginkorrago erabiltzeko.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta