Euskal Herriko Pentsiodunen Mugimenduak (EHPM) deituta, milaka lagunek manifestazioa egin dute gaur Bilbon, EAEko gutxieneko pentsioak lanbide arteko gutxieneko soldatarekin parekatzea eskatzeko. Plaza Eliptikotik abiatu eta Udaletxearen aurrean amaitu da manifestazioa, hain zuzen, asteroko elkarretaratzeak egiten dituzten toki berean.
Mobilizazioarekin EHPMk iragarri du datorren irailaren 8an ekingo diela mugimenduak berriro ere manifestazioei EAEko udalerri eta hiriburuetan, hain justu sindikatuek eta pentsiodunek bultzatutako Herri Ekimen Legegileari (LHE) buruzko txostena aurkezteko Eusko Jaurlaritzak duen epemugarekin bat eginda. Jon Fano mugimenduko bozeramaileak gogorarazi du pentsiodunek proposamenaren aldeko 145.142 sinadura bildu dituztela azken hilabeteetan.