Pentsiodunak kalera atera dira beste behin, gaur, PPk EAEko hiriburuetan dituen egoitzen aurrera. Izan ere, asteartean Espainiako Kongresuaren ezohiko osoko bilkuran erabaki zen ezezkoa ematea pentsioen balioa handitzea bermatzen zuen dekretuari. Gobernuak pentsio duinak izateko eskubidea ez bermatzea “onartezina” dela adierazi dute pentsiodunek, eta jakinarazi dute otsailaren 20rako soluziorik izan ez bada, mobilizazioei ekingo dietela berriro ere.
Bilboko Bizkaia plazan, Gasteizko Olagibel kalean eta Donostiako Illunbe kalean elkartu dira, PPkoek “pentsiodunen haserrea” entzun dezaten. Dekretuari ezezkoa eman zion taldeak, Vox, UPN eta Juntsekin batera, arrazoituta Omnibus Lege horrek okupazioaren alde egiten zuela eta ezin zutela horren alde bozkatu.
Ildo beretik, pentsiodunek adierazi dute “lotsagarria” dela pentsio duinak izateko eskubidea “alderdi politikoen arteko eztabaidetan trukerako txanpona” izatea. “Pentsioen erosteko ahalmena bermatzea ezin da Kongresuan urtero egiten den bozketaren menpe egon”, salatu dute. Azken datuen arabera, Hego Euskal Herrian 220.069 pentsiodun daude gutxieneko soldata minimoa baino pentsio baxuagoarekin, zeinak ezin dituzten “bizi-baldintza duinak izan”.