Balore Merkatuaren Espainiako Batzordeak (CNMV) onartu berri du Ohmnia taldeak Azkoyen Group bereganatzeko egindako Erosketa Eskaintza Publikoaren eskaera ofiziala, eta izapideekin aurrera jarraituko du prozesuak. Uda honetan, 244,5 milioi euroko eskaintza egin zuen Jose Antonio Jainaga buru duen taldeak enpresa nafarra erosi asmoz.
Ohar bidez, CNMVk jakinarazi du onartu egin duela Ohmnia Electronics SLk abuztuaren 24an aurkeztutako eskaera, zeinak helburu zuen Azkoyen SAren akzioen %100 eskuratzea, borondatezko eskaintza publikoa eginda.
CNMVk zehaztu du eskaera izapidetzeko onartzeak ez duela esan nahi eskaintzaren baimenari edo horren baldintzei buruzko ebazpenaren inguruko iritzirik ematen denik; izan ere, ebazpen hori "aurreikusitako epeen eta gainerako betekizunen arabera" eman beharko da.
Ohmnia taldeak pasa den abuztuaren 24ean egin zuen ofizialki erosketa eskaintza, eta Azkoyenek begi onez ikusi zituen haren baldintzak.
Ohmnia talde industriala Carmen Lequerica Holding, Euskal Finantzen Institutua eta Vital Banku Fundazioak osatzen dute, eta BBK Fundazioa eta Kutxabanken Indar Kartera batu zaizkie operaziora. Astelehenean CNMVn erregistratu zuten Azkoyen multinazionalaren akzio guztien gaineko Erosketa Eskaintza Publikoa abiarazteko eskaera, akzio bakoitzeko 10 euroko prezioan, guztira 244,5 milioi euroren truke.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta