1996an, gazte talde batek KOT sortu zuen Laudion. Orduan abiatu zen gaur egun Euskal Herri osoan ezaguna den kirol-arropa marka arrakastatsua. Beren filosofia ekologistari leial, kotoi organikoa eta beste material jasangarri batzuk erabiltzen dituzte beren kamiseta, jertse eta gainerako produktuak ekoizteko. Inportazioko arropa merkearen garaiotan, haiek kalitatearen aldeko apustua egin eta ekonomikoki bideragarriak izatea lortu dute, beren balioei uko egin gabe.
Markaren 30. urteurrenean, proiektuan hogei urte baino gehiago daramatzan Eider Arbaizagoitiarekin mintzatu gara, KOTen historian zeharreko ibilbide azkar bat egiteko.
Noiz eta nola sortu zen KOT?
Orain dela 30 urte, lagun talde batek KOT sortu zuen Laudion. 1996an sortu zen gure arropa marka. Helburua kirol-arropa eta jantzi informalak uztartzea zen, gure lurraren ikurrak kalitatezko produktuekin lotzeko. Horretarako, kotoia erabiltzea erabaki genuen, eta hortik sortu zen markaren izena.
Sorreratik, zuen diseinuak naturari lotuta egon dira. Lehen urteetan, gure lurraldeko zuhaitzen hostoak eta animaliak agertu ziren zuen kamisetetan.
Bai, gure lehenengo diseinuak inguruko hostoak eta animaliak izan ziren, eta hortik aurrera Euskal Herriko mendiak diseinatzea izan da gure indarrik handiena. KOTek Euskal Herriko txokoak, animaliak eta natura erakustea du oinarri. Markak naturarekin duen lotura ezinbestekoa da guretzat. Euskal Herria maitatzea eta naturarekiko errespetua dira gure bi ardatz nagusiak.
Mende berriaren atarian etorri zen zuen bildumarik arrakastatsuena: Euskal Herriko mendi gailurrena.
Mendi gailurrak KOT markaren ikur bihurtu dira. Denborarekin konturatu gara jendeak gure herriko mendi bat, ikur bat, kamisetetan eramatea gustuko duela, identitate-adierazle gisa.
"KOTek Euskal Herriko txokoak, animaliak eta natura erakustea du oinarri. Jendeak identitate-adierazle gisa janzten du gure arropa"
2006an kooperatiba bihurtu zineten. Zergatik?
Hasieran, KOT Tramankulu Grafikoak deituriko proiektuaren barruan zegoen. Lau lagunek abiatu zuten lehen proiektu hura. Gero, pertsona berriak batu ginen eta, 2006an, kooperatiba bihurtzea erabaki genuen, gure filosofia eta lan egiteko modua kooperatiba izaerarekin gehiago identifikatzen zelako. Gaur egun, hamar bazkide gara eta, KOT markaz aparte, diseinu grafikoa, seinaletika eta errotulazioa eta promoziorako produktuak lantzen ditugu.
Hurrengo urteetan zuen marka hedatzen jarraitu zenuten. Euskal Mendi Federazioarekin eta beste erakunde batzuekin akordioak lotu zenituzten.
Esparru ezberdinetan ibili izan gara gure ibilbidean zehar, eta aberasgarria izan da oso. Hainbat erakunderekin aritu gara lanean; Nafarroa Oinez, Euskal Mendi Federazioa edo Bertsozale elkartea, besteak beste.
Gaur egun, zuen arropa gero eta denda-sare zabalagoan presente dago.
Gaur egun hogeita hamar salmenta puntu inguru ditugu Euskal Herrian zehar. Eta Piriniotan beste salmenta puntu bat ere badugu. Bestalde, badira urte batzuk gure www.kot.eus martxan jarri genuenetik, eta haren bidez salmenten hazkunde nabarmena izan dugu. Aurten, 30. urteurrena aitzakiatzat hartuta, gure web orria eguneratu dugu eta orain gure historia irakur daiteke bertan. Oso harrera ona izan du. Gainera, sare sozialetan presentzia handituz joan gara eta horrek gure marka gehiago ezagutarazten lagundu digu.
KOT abiatu zenutenean, zein zen zuen erosleen profila? Urteek aurrera egin ahala, profil hori aldatzen joan da?
Gure lehen urteetako eroslearen profila neska-mutil gazte batena zen. Aldiz, gaur egun, profil horrez gain, beste motatako bezeroak ere baditugu. Neska eta haurrentzako arropak, adibidez, gero eta arrakastatsuagoak ari dira bilakatzen. Eta jada ez dira bakarrik gazteak KOT marka erosten dutenak, badago adin tarte bat, 40tik gorakoak, KOT janzten dugunok.
"Hasieran, neska-mutil gazteak ziren gure bezero nagusiak; gaur egun, ordea, 40 urtetik gorako erosleak ere baditugu"
Hasieratik kotoia erabili duzue zuen arropa ekoizteko. Gaur egun, kotoi organikoaz gain, beste material jasangarri batzuk ere gehitzen hasi zarete.
Bai. Jasangarritasunaren bidetik jo dugu eta egunero ikasten eta hobetzen saiatzen gara. Esan bezala, gure ekoizpenaren oinarria kotoi organikoa da, baina horrez gain, material jasangarri berriak erabiltzen hasi gara; tenzela (zelulosa oinarri duen ehuna) eta birziklatutako poliesterra kasu.
KOTen 30. urteurrena ospatzeko, Euskal Herriko mendi gailurren jatorrizko diseinuak berreskuratu dituzue. Zer harrera izaten ari dira?
Bai, 30. urteurrena dela-eta, gure lehenengo mendien diseinuekin revival bat egitea bururatu zitzaigun. Ideia oso arrakastatsua izan da eta guk aurreikusi baino gehiago saldu dugu. Gorbeia eta Anboto diseinuak berriz egin behar izan ditugu, beraz, oso pozik gaude. Udazken-neguko bilduma berrian ere gure urteurrena ospatzen jarraituko dugu.
Zer plan dituzue hemendik aurrera?
Betiko ilusioaz aurrera jarraituko dugu. Gure helburu nagusia KOT markaren presentzia handitzea izango da.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta