Uvesco Taldea, BM eta Super Amara supermerkatu kateen jabeak eta 7.000 langile baino gehiago dituenak, EAEn errotuta jarraitzeko pausoa prestatzen ari da. Diario Vasco egunkariak jakinarazi duenez, zuzendaritza taldeko kide batzuek, Angel Jareño zuzendari exekutiboa buru izanik, enpresa erosteko operazioa bultzatu dute; gaur egun, PAI Partners funts frantziarrak kontrolatzen du taldearen %70. 700 milioi euro baino gehiagoko balioa du operazioak.
Iaz, Carrefour supermerkatua saiatu zen Uvesco erosten, eta beste hainbatek ere (Auchan enpresa frantsesak eta Sonaek) interesa erakutsi zuten konpainiarekiko, baina azkenean ez zen hala izan
Eragiketa aurrera eramateko, euskal inbertitzaile talde bat bildu du Jareñok. Horien artean daude Indar (Kutxabank), Donostiako Stellum Food & Tech funtsa, Inveready funtsen kudeatzailea eta Geroa BGAEa, Orza sozietate bateratuaren bidez parte har lezakeena. Aliantzak helburu du konpainiaren etorkizuna EAEn bertan geratzea.
Egunkariak azaldu duenez, operazioa “Rubicón” izenez da ezaguna, eta Management Buy Out (MBO edo zuzendaritza-erosketa) izeneko prozesu gisa definitu daiteke, non zuzendariek beraiek hartzen duten enpresaren kontrola. Iturrien arabera, talde kudeatzaileak dagoeneko ziurtatu du beharrezko finantzaketa, zor-funtsen laguntzarekin, eta urrats hori funtsezkoa da eragiketaren arrakasta bermatzeko. Gainera, akziodun minoritarioek ere bat egin lezakete erosketarekin.
Negoziazioak bukatzear omen dira, bazkideen arteko botere banaketari buruzko doikuntzen eta Merkatuaren eta Lehiaren Batzorde Nazionalaren (CNMC) baimenaren zain. EAEko erakundeek, Imanol Pradales lehendakaria eta Mikel Jauregi Industria sailburua buru, gertutik jarraitu dute konpainiaren prozesua, eta akordioa errazteko borondatea adierazi dute.
