Eusko Jaurlaritzak Gasteiz tentsio handiko eremu izendatu du; BOEn urriaren amaieran argitaratzean izango da neurria guztiz behin betikoa. Maider Etxebarria alkatearen esanetan, kalifikazio horrek atea irekitzen dio “datorren hiru urteetan etxebizitza eskuragarriaren eskaintza zabaltzeko eta merkatuaren disfuntzioak zuzentzeko politika publikoak aplikatzeari”.
Denis Itxaso Etxebizitza eta Hiri Agendako sailburuak neurri hori “maizterrak babesteko” tresna baliagarritzat jo du, “gaur egungo higiezinen lege kaotikoaren menpe baitaude”, eta azpimarratu du erronka dela eskaintza eta eskaera orekatzea alokairuko etxebizitza babestu gehiago eraikita. Arabako hiriburua tentsio handiko gune izendaturik, EAEko biztanleen %47,7 tentsiodun udalerrietan bizi da jada, eta ehuneko hori %50etik gorakoa izatea aurreikusten da datozen hilabeteetan.
Izendapenari esker, bost ardatzetan banatutako plana garatuko da hirian, zeinaren oinarri nagusia 3.012 etxebizitza eraikitzea izango den, erdiak baino gehiago alokairu babestuak izanik. Horietatik 950 ekimen publikokoak izango dira Zabalganan, Salburuan, Ibaiondon eta Abetxukon; 1.383 sustapen pribatuetakoak izango dira; eta 679 Udalaren eta Eusko Jaurlaritzaren artean sinatutako hitzarmenekoak. Gainera, alokairuaren prezioak tokiko biztanleriaren ia %98ari mugatu egingo zaizkio, Etxebizitza Legean aurreikusitako gehienezko prezioak aplikatuta.
Birgaitze, efizientzia energetiko eta irisgarritasunerako laguntzak ere jasotzen ditu planak, arreta berezia jarrita Zaramaga bezalako auzoen biziberritzean, non 31 milioi euro baino gehiago inbertituko diren 322 etxebizitzatan. Horri neurri fiskalak gehitu behar zaizkio, hala nola, hutsik dauden etxebizitzei Ondasun Higiezinen gaineko Zergan %50eko errekarguak, eta Eraikin, Instalazio eta Lanen gaineko Zergan hobariak Babes Ofizialeko Etxebizitzetarako eta birgaitzeetarako. Era berean, beheko solairuetan lokalak egitea eta aldi baterako ostatua ematea aurreikusten da, gazteei, adinekoei eta kolektibo ahulei zuzenduta.
