Pasa den astean A63 Ultra izeneko nekazarien taldeak blokeatu zuen A63 autobidea, Baiona inguruan, ez baitaude ados dermatosi nodular kutsakorraren aurkako protokoloaren kudeaketarekin eta Mercosurreko hitzarmenarekin. Pil-pilean dira bi gaiak, eta Hego Euskal Herriko nekazari zein abeltzainen txanda izan da gaurkoan.
Hain zuzen ere, ENBA (Euskal Nekazarien Batasuna), EHNE (Euskal Herriko Nekazarien Elkartasuna), eta UAGN (Nafarroako Nekazari eta Abeltzainen Batasuna) nekazaritza sindikatuek kontzentrazioa egin dute gaur Biriatuko mugan, abeltzaintza-sektoreak bizi duen egoera larria ikusarazteko eta administrazioen aurrean duten babesgabetasuna salatzeko. +
Azken egunotan, Ataca elkarteak deituta, Araban ere traktoreak atera dituzte errepidera, eta Nafarroan ere antzeko mobilizazioak izan dira.
Mobilizazioa goizean hasi da, baserritarrak autoz, furgonetaz eta traktorez iritsi direnean. Ibilgailuak Irungo (Gipuzkoa) Zaisa industrialdean aparkatu ondoren, parte-hartzaileak oinez abiatu dira Biriatura, Ertzaintzak lagunduta. Bertan, hainbat traktorerekin batera elkartu dira, eta eguerdian manifestua irakurri dute.
Sindikatuen arabera, protesta egiteko arrazoi nagusietako bat Nekazaritza Ministerioak izan duen “jarrera epela” da, dermatosi nodular kutsakorraren hedapenaren eta Mercosur merkataritza-akordioaren aurrean. Txertaketa-estrategia kritikatu dute, eta Frantziako mugakide diren autonomia-erkidego guztiak osorik txertatzeko beharra azpimarratu dute, animalien mugimendu etengabeek arriskuak areagotzen dituztela ohartarazita.
Halaber, salatu dute mendiko herrietan hutsuneak egon daitezkela txertaketari dagokionez, eta ohartarazi dute horrek ehunka edo milaka abelburu dituzten ustiategiak kolokan jar ditzakeela. Sindikatuek salatu dutenez, hutsune horiek “kolpe suntsitzailea” lirateke sektorearentzat, bai ikuspegi ekonomikotik, bai psikologikotik, eta ustiategi askoren itxiera ekar lezakete.
Bestalde, Europar Batasunaren eta Mercosurren arteko merkataritza-akordioaren aurkako jarrera ere erakutsi dute nekazariek. Sindikatuek uste dute akordioak Europako abeltzainak babesik gabe uzten dituela Hego Amerikako haragi-ekoizle handien aurrean, eta eskatu dute inportatutako produktuek hemen eskatzen diren estandar berberak betetzea. Horregatik, eurodiputatuei akordioaren berrespena ez onartzeko eta Europako Justizia Auzitegian helegitea aurkezteko ekimenei babesa emateko eskatu diete.