Talgok 0,6 milioi euroko Ebitdarekin eta 100 milioi inguruko galera garbiekin itxi zuen 2025eko ekitaldia. Hala ere, finantza-zorra 394 milioi eurora murriztu zen, eta, aparteko eraginak kenduta, Ebitda 53,9 milioira iritsi zen. 2026rako, 700 milioi eurotik gorako diru-sarrerak aurreikusten ditu konpainiak, eta %7,5 eta %8,5 arteko Ebitda marjina.
Enpresak 2025eko amaieran akziodunetan eta finantzetan izandako aldaketen ondoren ekingo dio etapa berri honi. José Antonio Jainaga Talgoko presidenteak azaldu zuenez, akziodun berriak sartzeak eta finantzaketa indartzeak egonkortasuna emango dio konpainiari epe luzerako proiektuei ekiteko. Horrez gain, adierazi du espero dutela datozen asteetan Renferekin akordioa behin betiko ixtea, Avril proiektuaren entregen harira.
Azkenaldiko kontratu nagusien artean, nabarmentzekoak dira 2025ean Flix Trainekin sinatutako akordioa 65 tren hornitzeko, Talgo 230 trenak Deutsche Bahn eta DSBrentzat martxan jartzea, 2026ko otsailean Saudi Arabiak abiadura oso handiko 20 trenen eskaera gehigarria berrestea eta Trafikverketekin kontratu berri bat sinatzea. Proiektu horiei esker, eskaera-zorroa 4.466 milioi eurotik (2025aren amaieran) egungo 6.307 milioietara (inoizko kopururik handiena) pasatu da.
Bestalde, datozen urteei begira, Talgok bere ahalmen industriala handitu nahi du Rivabellosa eta Las Matas lantegietan inbertsioak eginez, 2028. urtea amaitu baino lehen ekoizpena bikoizteko asmoz. Konpainiak 200 langile baino gehiago kontratatu ditu dagoeneko, ekoizpen-jarduera indartzeko, eta plantilla industriala eta ingeniaritza-taldeak handitzen jarraitzea aurreikusten du.
Era berean, konpainia lanean ari da plan estrategiko batean, zeina uda ostean aurkeztuko duen; planak datorren hamarkadarako lehentasunezko produktuak, merkatuak eta gaitasun industrialak definituko ditu. Halaber, etorkizunean hazkunderako aukerak ikusten ditu enpresak, batez ere Erdialdeko eta Ekialdeko Europako herrialdeetan; gaitasun teknologiko berrien garapenean ere lan egingo du konpainiak, EAEn kokatuko den Talgo TeknoRail izeneko ikerketa-unitate berri baten bidez.
