CAFek bi kontratu berri lortu ditu Frantzian, 300 milioi euroko balio bateratuarekin. Akordioen arabera, 38 tranbia ekoitziko ditu Grenoble hirirako eta hamalau tren Frantziako erdialde-ekialdean dagoen Borgoina-Franche-Comté eskualderako.
Lehen hitzarmenari dagokionez, Syndicat Mixte des Mobilités de L'Aire Grenobloisek (SMMAG, Grenoble Eremuko Mugikortasuneko Sindikatu Mistoa) egin dio eskaera euskal konpainiari, zeinarentzat 38 tranbia Urbo ekoitzi beharko dituen. Etorkizunean, beste bederatzi tranbia gehigarri prestatzea ere aurreikusi dute. Hitzarmenak “CAFen beste arrakasta bat Frantzian” islatzen duela adierazi du enpresak.
Tranbia horiek 281 bidaiarirentzako gaitasuna izango dute, baita aire girotua eta aulki gurpilduna duten pertsonentzako sarbide egokiak ere. CAFen Bagnères-de-Bigorreko egoitzan ekoitziko dira garraiobideak.
Bestalde, Borgoina-France-Comté eskualdeak CAF-Alstom partzuergoari esleitu dio Coradia Polyvalenterako hamalau trenen eskaera. Kontratatu hori, ordea, 2022an euskal konpainiak Reichshoffen instalazioa erosi ondoren Alstomekin sinatutako akordioren bitartez sortu da. Ondorioz, Beasaingo konpainiak diseinatu eta fabrikatuko ditu ekipoak, baina Alstomek hornituko ditu.
Hamalau trenetatik bost Intercités tren elektrikoak izango dira, zeinak 355 bidaiarirentzako espazioa duten; gainerako bederatziak lau bagoiko eta 228 bidaiarirentzako gaitasuneko TER trenak izango dira.